ننګرهار د کتابونو د پلور لپاره لوی مارکېټ لري، هره ورځ دغه مارکېټ ته د مطالعې مینه وال، د ښوونځي زده کوونکي او محصلین ورځي او د خپلې اړتیا وړکتابونه پېري.
کتاب پلورونکي او د خپرندویه ټولنو مسوولین وايي، ننګرهار کې د کتابونو چاپ لپاره د اسانتیاوو نه شتون له امله ګاونډيو هېوادونو ته محتاج دي او څو میاشتې په تمه وي، ترڅو په نورو هېوادونو کې د دوی کتابونه چاپ او تر دوی را ورسېږي.
په ننګرهار کې د ختیځ خپرندویه ټولنې مسوول ذاکرالله ناصري وايي: « موږ خپل کتابونه د چاپ لپاره پېښور ته استوو. تر هغو چې چاپېږي او بېرته تر موږ را رسېږي، میاشتې وخت نیسي. که چاپ خونې په ننګرهار کې جوړې شي او په ښه کیفیت کتابونه چاپ کړي، دا به ډېره ګټه وکړي. دلته معیاري چاپ خونې نه شته، ځکه خو موږ خپل کتابونه د چاپ لپاره پېښور، لاهور یا هم ایران ته استوو.»
له دې سره، د ننګرهار اطلاعاتو او کولتور ریاست مسوولین وايي، هڅې یې پیل کړې، څو پانګه وال وهڅوي چې ننګرهار کې د کتاب چاپولو په برخه کې پانګونه وکړي.
دوی وايي، د ننګرهار آزادۍ مطبعې لپاره یې هم د ځینو تخنیکي وسایلو وړاندیزونه له مرکز سره شریک کړې او له منظورېدو وروسته به په دولتي مطبعه کې هم د کتابونو د چاپ اسانتیاوې برابرې شي.
د ننګرهار اطلاعاتو او کولتور ریاست د اطلاعاتو آمر صدیق الله قریشي وايي: «د ننګرهار ولایت د اطلاعاتو او کولتور ریاست هڅه کوي چې د آزادۍ دولتي مطبعې لپاره امکانات برابر کړي. د همدې لپاره څو ځلې له مرکز سره ناستې شوې او تمه شته چې ځینې ماشینونه دلته راوړل شي. په دې سره به د کتابونو د چاپ ستونزه تر ډېره هواره شي.»
د کتاب مینه وال او پلورونکي ټینګار کوي، که په کور دننه د کتابونو د چاپ لپاره اسانتیاوې زیاتې شي، نه یوازې د کتابونو بیې به راټیټې شي، بلکې د کتاب لوستلو او پلورلو اوسنی سوړ بازار به هم ورسره ګرم شي.
