د ننګرهار ولایت په کامې ولسوالۍ کې د کتاب لوستنې فرهنګ دودلو په موخه ګرځنده کتابتون په کار پیل کړی دی.
دا ګرځنده کتابتون کامې ولسوالۍ کې پر کلیو، مکتبونو ګرځي، ترڅو خلک له کتاب لوستنې سره اشنا او د کتاب لوستنه عامه کړي.
په دغه ګرځند کتابتون کې نږدې زر ټوکه بېلا بېل کتابونه راټول شوي،چې خلک په وړیا ډول ترې ګټنه کولای شي.
د یاد ګرځنده کتابتون مسوول قاري محمد شاه وايي:« موږ په دې کې تر زرو پورې کتابونه ځای پر ځای کړي. د خلکو، یا کلي، یا مکتب د غوښتنې په کتو هلته ورته کتابونه پرېږدو. لکه یو شمېر دیني علمانو غوښتي ول،چې خطې اړوند کتابونه ورکړو او دوی ترې خپله خطبه پوره کړه او کتابونه یې بېرته موږ ته وسپارل.»
له دغې چارې عام خلک خوښ دي،چې د خپل ذوق کتاب په کور، کلي کې په وړیا ډول ترلاسه کوي او دا چاره په ټولنه کې د کتاب لوستنې دود لا پیاوړتیا لامل بولي.
دوی وايي، له کتاب لوستلو سره یې مینه شته،خو کتاب ته نه لاسرسی او اقتصادي ستونزو دوی له کتابه لرې پاتې کړي دي.
د کامې ولسوالۍ یو تن اوسېدونکی وايي:« دا ډېره مهمه ده،چې د یو چا کور ته کتاب یوسې. نور هغه ورته وخت هم لري او په ښه شوق سره کتاب ګوري او ورته خوشحاله کېږي. دا د کامې خلکو له پاره ډېر ګټور کار دی. د خلکو پوهه ورسره زیاتېږي.»
د کتابتون مشر وايي، د کرځنده کتابتون یوه لویه موخه ښځینو ته کتاب رسوونه ده، ځکه په وینا يي ښځينه د کتاب اخېستلو کې له ستونزو سره مخ وې.
محمد شاه زیاته کړه:« نو په مجموع کې خوندې چې په مکتب کې وې، کتابونو ته لاس رسی نه لري. موږ هغوی ته کتابونه سپارلي، ترڅو مطالعه يي کړي.»
په هېواد کې هر کال په زرګونه ټوکه بېلابېل کتابونه چاپ کېږي، عامو خلکو له مطالعې سره نه ذوق له امله ډېرې یوازې په کتابتونونو کې پاتې دي.
