د ننګرهار ولایت په مرکز جلا آباد ښار کې د دولتي ادارو او ښاریانو له خوا د ښار پاکولو ګډ اشر ترسره شو.
چارواکي وايي، د دې اشر موخه د ښار پاکوالي او ښاري فرهنګ په رواجولو کې خلکو ته د عامه پوهاوي ورکول دي.
د اشر ګډونوال بازمحمد ځوانمل وايي: « په جلال آباد ښاریانو باندې غږ کوم چې نه یوازې د نن په څېر اشر کې برخه واخلي بلکې د دې ګډ کور د پاک ساتلو لپاره تل ګامونه پورته کړي.»
د اشر یو بل ګډونوال ګل ولي شاه وايي: «له ټولو درنو ښاریانو هیله لرو چې ښار پاک وساتي او د ننني اشر په څېر د هر کس لپاره په کار ده چې د خپل کاروبار شاوخوا ځایونه پاک وساتي.»
د جلال آباد ښار يو شمېر نور اوسېدونکي وايي، ښاروالۍ دې په ښار کې د کثافت دانیو پر زیاتولو سربېره د کثافاتو پر وخت لېږدولو اوهمدارنګه د ښار لپاره د یوه منظم کانالیزاسیون لپاره ګامونه پورته کړي.
د جلال آباد ښار اوسېدونکی حابت میر وايي: « زموږ په ساحه کې د کثافاتو اچولو وسایل نه شته. له ښاروال غوښتنه کوو چې د دې لپاره منظم ځایونه جوړ کړي.»
د جلال آباد ښار یو بل اوسېدونکی رحمت الله بیا وايي: « د ټول ښار اوبه د مخابراتو چوک خواته روانې وي او د باران پرمهال ترې تېرېدل ناشوني وي. تر ټولو زیاته لومړۍ ناحیه له ستونزو سره مخ ده. دا ښار کانالیزاسیون ته اړتیا لري او اوبه یې نه دي ایستل شوې. زموږ غوښتنه ده چې د ښار اوبه سیند ته ویستل شي.»
د جلال آباد ښاروالۍ مسوولین وايي، دوی هره ورځ له ۷۰ تر۷۵ لاریو کثافات له ښاره وباسي خو دا چې ښار ګڼ نفوسه دی، ولس باید په دې برخه کې له دوی سره همکاري وکړي.
مسولین زیاتوي، د ښار لپاره د کانالیزاسیون جوړولو لپاره د یوه منظم پلان پر بنسټ ګامونه پورته کړي ترڅو د ورښتونو پرمهال ښاریان له اوبو په تکلیف نه شي.
د جلال آباد ښاروال نقیبالله طارق وايي: « د باران اوبو د مخنیوي لپاره له خپل وس او توان سره هڅه کوو ترڅو خلک را روان ژمی له ستونزو سره مخ نه شي.»
د جلال آباد ښار لپاره د کانالیزاسیون پر جوړېدو او ښار پاکونې په برخه کې د ولس غوښتنې داسې مهال ډېرې شوې دي، چې ژمی را روان دی او او ښار کې د منظم کانالیزاسیون نه شتون له امله د ورښتونو پرمهال باراني اوبه د خلکو هټیو او کورونو ته ننوځي او خلکو ته له روغتیايي ستونزو سربیره مالي زیانونه هم اړوي.
