Skip to content
د ننګرهار امینه قوماندانۍ مسولین وایي، وړمه شپه یې د مطیع الله نوم ماشوم د دندې پر وخت د انسان تښوونکو له منګولو ازاد کړی او خپلې کورنۍ ته یې وسپاره.
د امنیه قوماندانۍ ویاند حافظ عبدالبصیر زابلی وايي، دغه ماشوم شااوخوا شپږ میاشتې وړاندې د کندز ښار اړوند پنځمې ناحیې انسان تښتوونکو تښولی وو،چې اوس د ننګرهار مرکز جلال اباد ښار اتمې ناحیې کې د قوماندانۍ مسولینو د دندې پر وخت په یو چک پواینټ کې نیولی او انسان تښتوونکي ترې په تېښته بریالي شوي.
زابلي زیاته کړه:«دغه ماشوم شااوخوا شپږ میاشتې وړاندې د کندز ښار د پنځمې ناحیې اړوند انسان تښتوونکو تښتولی وه. نن د ننګرهار ولایت امنیه قوماندانۍ سرتېرو د اتمې ناحیې اړوند د دندې پر وخت دغه ماشوم د انسان تښتونکو له منګولو ازاد کړ او نن مو خپلې کورنۍ ته وسپاره.»
تښتول شوی ماشوم مطیع الله له یوې اوږدې مودې وروسته،چې په سختۍ پرې تېره شوه،له خپلې کورنۍ سره یو ځای شو او خوښ بریښي.
مطیع الله وايي:« د کندوز د پنځمې ناحیې ناحیې اوسېدونکی یم. ښار ته تلم. د وزلوبې په میدان کې یوه توره کرولا چې تورې ښيښې یې وې. لومړۍ مخ ته ولاړه. دوه تنه ترې ښکته شول زما په لوري راغلل او زه یې په زور له ځان سره موټر ته وخېژوم. یوه ښځه وه. دوه ماشومان وو. یو موټرچلوونکی او دوه تنه نور وو. یوه ټوټه یې لاس کې وه او زما په پزه یې وټومبله. نور بیا زه په ځان ونه پوهېدم. »
د یاد ماشوم پلار مولوي عبدالله چې یې د زوی موندلو لپاره ډېره هڅه کړې وه او د ډېرو ادارو دروازې یې ټکولې وې،خو تش لاس او بې د زوی موندلو ناهیلی کور ته ستون شوی وو،اوس ډېر خوشاله دی او د ننګرهار د امینې قوماندانۍ له مسولینو مننه کوي.
عبدالله زیاتوي:« زوی مې مطیع الله شپږ میاشتې مخکې له کندزه تښتول شوی وه. اوس د ننګرهار ولایت د اسلامي امارت د اتمې حوزې منسوبینو د انسان تښتوونکو له منګولو ازاد کړ. مننه ترې کوم.»
دا لومړی ځل نه دی،چې یوه کورنۍ له خپل ورک ماشوم پسې دومره ستړې ګالي، له دې وړاندې هم د هېواد په ګڼو برخو کې د پېسو لپاره د ډېرو کورنیو تنکي ځوانان او ماشومان د انسان تښتوونکو له لورې تښتول شوي،چې ګڼ یې وژل شوي دي.
خلک انسان تښتونکو ته د سختې سزا غوښتنه کوي.
دوی وایې،دا ډول مجرمینو ته د سختې سزا په ورکولو سره به نورو ته عبرت او ټولنه به له ورته جنایتونو خلاصه شي.
