دوی شکایت کوي،چې هره ورځ د کار په تمه راځي،خو په خبره یې، د ورځې په وروستیو کې بېرته تش لاس کور ته ځي،ځکه څوک یې کار ته نه بیایي.
جلال اباد ښار کې یو تن کاریګر وايي:« چوک ته راځو،خو کار نه پېدا کېږي. دا کار مشکل دی، که کار پېدا هم شي، په میاشت یا اوونۍ کې یوه ورځ دیاړي وي، و یا هم دونیم سوه روپۍ دیاړي وي. هغه چې کور ته لاړ شو سودا پرې نه کېږي او که د ناروغ مشکل پېدا شي،هغه مشکل وي ډاکټر ته تلل ورکې وي. په ۲۵۰ روپۍ کار نه کېږي،هغه هم په میاشت کې یوه ورځ وي چېرته پېدا شي. زموږ هیله له چارواکو او حکومته دا ده،چې غږ مو واوري. »
جلال اباد ښار کې یو تن کاریګر وايي:« نن ۲۵ ورځ ده،چې ګوتې مې هم کار کې نه دي لمدې شوي. هر یو راځي او بېرته تش روان دی. الله ج دې پر موږ رحم وکړي،چا ته به ووایو چې زموږ روزګار نه شته. چاته وژاړو او چاته شکایت وکړو.»
دوی له اسلامي امارت غواړې،چې د کار زمینې برابرې کړي او له مرستندویه ادارو غواړې،چې لاس نیوی یې وکړي .
جلال اباد ښار کې یو تن کاریګر وايي:«اوس له اسلامي امارت نه هیله او توقع ده،چې موږ ته د کار زمینه برابره کړي. والله چې نن شپه مې بچي وږي ویده دي او نن ترې پټ راغلای یم چوک ته ټوله ورځ په چوک کې ګرځم،لس روپۍ څوک د الله په نوم نه راکوي.خو زموږ مال ته ناست دي او پښې مو وهي ورونو د الله لپاره د مزدورانو په حال نظر واچوئ. موږ هر یو حکومت برباد کړي یو.»
یو شمېر بیا وایې، که کار ورته پېدا هم شي،دومره مزدوري څوک نه ورکوي،چې د دوی اړتیاوې دې پرې پوره شي.
دوی وایې، خلک ورسره چنۍ وهي او د هغه مزدورۍ نیمه برخه ورکوي، کومه به یې چې وړاندې اخېستله.
یو تن کاریګر وايي:« موږ د ورځې ۲۵۰ روپۍ کو په دې به څه وکړو ډاکټر ته یې ورکړو او که د کور نوره سودا پرې واخلو موږ به اخیر څه کوو تر څو پورې به خوار او زار ګرځو درې میاشتې مې د کور کرایه نه ده ورکړې اخیر زموږ سره څوک مرسته کوي او کنه غم مو کوي او کنه.»
دا چې طالبانو تازه د هېواد واک تر لاسه کړی،په ورستۍ خبرپاڼه کې یې تر ډېره خلکو ته د کار او رزوګار په پیدا کولو ټینګار کړی دی او د خلکو د اقتصادي ستونزو حل یې په لومړیتوبونو کې شمیرلی دی.
