روشن لومړنی مخابراتي شرکت شو چې د خپلو ټولو پېرودونکو د سیمکارټونو د ثبت لړۍ یې بشپړه کړه.
د یاد شرکت استازی وایي، که څه هم دا چاره په لومړیو کې ستونزمنه وه، خو دوی وتوانېدل چې د خپلو ټولو پېرودونکیو سیمکارټونه په بشپړ ډول ثبت او راجسټر کړي.
د روشن مخابراتي شرکت استازی په دې اړه وايي: « ډېر خوښ یم چې نن په یوه داسې ویاړمنه ناسته کې ګډون کوم چې نه یوازې د روشن بلکې د ټول مخابراتي سکټور لپاره لاسته راوړنه ده. دا هغه لاسته راوړنه ده چې افغانستان کې د مخابراتي خدمتونو د قانونمندۍ، روڼتیا او نظم لپاره یو حیاتي ګام دی. »
بله خوا، د مخابراتو او معلوماتي ټېکنالوجۍ وزارت سرپرست که څه هم د مخابراتي شرکتونو له لوري د سيمکارټونو ثبتولو لړۍ ستايي، خو اعتراف کوي چې لاهم په هېواد کې مخابراتي خدمتونو معياري شوي نه دي.
د نجیب الله حقاني په خبره، ياد شرکتونه دې یوازې د سیمکارټونو پر ثبت بسنه نه کوي بلکې د مخابراتي خدمتونو د معیاري کولو لپاره دې هم جدي هڅې وکړي.
حقاني په دې اړه وايي: « یوازې دا یوه خبره کفایت نه کوي چې موږ د سیمکارټ ثبت ته ژمن پاتې یو. موږ باید د دې ترڅنګ لرې پرتو سیمو ته هم ورسېږو. نور خلک لاړل ۵ جي[پنځم نسل] ۶ جي باندې لګیا دي فکر کوي، خو زموږ خلک لاهم د ۲ جي له خدماتو محروم دي. نورو په دې اړه ډېر پرمختګونه کړي، خو موږ لاهم کمزوري خدمات لرو.»
حقاني همدا راز له نورو مخابراتي شرکتونو هم وغوښتل چې د خپلو پېرودونکو د سیمکارټونو ثبت او راجسټر ته د توجه ترڅنګ دې له دغه وزارت سره د کیفيت لوړولو په اړه خپلو ټولو کړو ژمنو ته پابند پاتې شي او له هر ډول سرغړونې دې ډډه وکړي.
د مخابراتو او معلوماتي ټېکنالوجۍ وزارت سرپرست په دې اړه وايي: « د جعل کارۍ مخه نیول شوې، د ملي احصایې له محترم ریاست سره تفاهم نامه لرو او د دې تفاهم نامې پر اساس د هر هغه چا تذکره تایید کېږي چې سیمکارټ ترلاسه کوي او که تایید نه شي، نه شي کولی تذکره ترلاسه کړي.»
که څه هم د روشن مخابراتي شرکت مسوولین د خپلو ټولو پېرودونکو د شمېر په اړه له جزییاتو ورکولو ډډه کوي، خو وایي، د ۲۰۲۲زېږدیز کال په مارچ میاشت کې یې د خپلو پېرودونکو د سیمکارټونو د ثبت او راجستر لړۍ پیل کړې وه او اوس دا لړۍ په بشپړ ډول پای ته رسېدلې.
