له شپږم ټولګي پورته د نجونو پرمخ د ښوونځیو له بندېدو نږدې څلور کاله تېرېږي.
په داسې حال کې چې د نوي ښوونیز کال پیل کېدو ته یوازې ل۱۰ ورځې پاتې دي، یو شمېر نجونې يو وار بيا په هېواد کې له شپږم ټولګي پورته پر زده کړو د بندیزونو دوام له امله اندېښنې څرګندوي.
یو شمېر محصلانې په دې تړاو وایي، د سرپرست حکومت په راتګ سره يې پر زده کړو د بندیزونو لګېدو او د تحصیلي بنسټونو بندېدو له امله، رواني ستونزو سره مخ شوې دي.
محصله فاطمه ساپۍ وايي: « نوی کال په پيل کېدو دی، خو د حکومت له خوا د ښوونځیو د پیل کېدو په اړه څه نه دي ویل شوي. ډېره موده وشوه چې موږ له زده کړو لرې یو او دا هغه څه دي چې موږ یې د خپل راتلونکي په اړه اندېښمن کړي یو. غوښتنه مې له حکومت او مسوولینو دا ده چې د نجونو پرمخ د ښوونځیو، پوهنتونونو او ټولو تعلیمي مرکزونو دروازې پرانیزي.»
ښوونکي هم زده کړې د نارینه او ښځینه و مساوي حق بولي او له سرپرست حکومت غواړي چې د نوي ښوونیز کال له پیل کېدو سره د نجونو پر مخ د تعلیمي بنسټونو دروازې پرانیزي.
ښوونکې حکیمه رسولي وايي: « نږدې څلور کاله کېږي چې د دې هېواد د نجونو او ښځو پرمخ د ښوونځیو، پوهنتونونو او هر ډول تعلیمي مرکزونو دروازې بندې دي. موږ نه پوهېږو چې د هېواد راتلونکی به څنګه کېږي او څه ډول به پرمختګ کوي.»
په ورته وخت کې د ښځو د حقونو یو شمېر فعالانې هم په دې نظر دي چې د ټولنې د نیمايي برخې پرمخ د ښوونځیو او پوهنتونونو دروازې تړل د دې لامل کېږي چې دغه قشر نورو هېوادونو ته کډه شي.
د ښځو حقونو فعاله مشتري دقیق وايي: « له اسلامي امارت هیله لرو چې څومره ژر کېږي د نجونو پرمخ د ښوونځیو دروازې خلاصې کړي، ترڅو نجونې هم خپلو مشروع اهدافو ته ورسېږي.»
له دې سره، د چارو یو شمېر کارپوهان په هېواد کې زده کړو ته د زمینې برابرول د حکومتونو مسوولیت بولي.
د چارو شنونکی سلیم پیګیر وايي: « د افغانستان اسلامي امارت دنده همدا ده چې نوی تعلیمي کال د افغان نجونو پر زده کړو پيل کړي، ترڅو موږ وکولی شو په راتلونکي کې یو داسې آباد او آزاد افغانستان ولرو چې خپلې ښځینه ډاکټرانې، انجینرانې او ښوونکې ولري. د افغانستان د ژغورنې یوازینۍ لاره تعلیم او تحصیل دی.»
دا په داسې حال کې ده چې د سرپرست حکومت له واکمنېدو سره لومړی د ۱۴۰۰ کال د زمري پر ۲۴ مه له شپږم ټولګي پورته د نجونو پرمخ د ښوونځیو دروازې او له هغې وروسته د ۱۴۰۱ کال د لیندۍ میاشتې پر ۲۹ مه د نجونو پرمخ د پوهنتونونو دروازې وتړل شوې
