د اسلامي امارت د سرپرست حکومت له لوري په نادولتي ادارو کې له کاره د ښځو راګرځولو پرېکړې په اړه لا هم کورني او بهرني غبرګونونه دوام لري.
تازه د ملګرو ملتونو د بشري حقونو ستر کمېشنر ولکر ټرک دغه پرېکړه له بشري حقونو ښکاره سرغړونه بللې او وايي، دا پرېکړه نه یوازې له بشري حقونو سرغړونه ده بلکې ښکاره تبعيضي عمل هم دی.
د ټرک په خبره، په نا دولتي ادارو کې له کاره د ښځو راګرځول په افغانستان کې پر بشري وضعيت ناوړه پايلې لرلی شي؛ ځکه په يادو ادارو کې د ښځو له لوري کار کول د ژوند ژغورنې اړوند مرستو په رسولو کې مهم دي.
هغه په دې اړه وايي:« زه د افغانستان واکمنو چارواکو وروستۍ اعلامیې ته چې په نادولتي ادارو کې د ښځو ګومارنې په صورت کې به د یادو ادارو جوازونه لغوه کوي، سخت اندېښمن یم. دغه کړنلاره په بشپړه توګه تېروتنه ده چې ترسره کېږي. په افغانستان کې بشري وضعیت نازک دی.»
ښځې هم په نا دولتي ادارو کې د ښځو کار بندولو له امله خواشينې دي او وایي، دغه ډول پرېکړې د ستونزو کمولو پر ځای ستونزې لا زياتولی شي.
دوی له سرپرست حکومته غواړي چې د کار او زده کړو په برخو کې دې پر ښځو ساحه نه تنګوي. صنعتکاره هیله مایار وايي: « کله چې د ښځو پر کارونو بندیز لګول کېږي، دوی له دې امله ډېرې اغېزمنېږي؛ ځکه چې ځینې ښځې د خپلو کورنیو سرپرستي پر غاړه لري او داسې څوک یې نه شته چې د کور لګښتونه یې ورکړي. زه له دولت هیله لرم چې په دې پرېکړه له سره غور وکړي او په راتلونکي کې یې بېرته واخلي.»
د سیاسي چارو کارپوهان هم د مرستو په رسولو او نورو عامه برخو کې د ښځو رول مهم ګڼي او له همدې کبله پر يادې پرېکړې له سره د غور کولو غوښتنه کوي.
د سیاسي چارو کارپوه محمد سلیم پیګیر وايي: « د مرستو رسولو هغه ادارې چې په افغانستان کې فعالیت لري، ښځو ته اړتیا لري ترڅو د دوی مرستې تر نورو ښځو او کورنیو پورې ورسوي. اسلامي امارت باید په دې اړه غور او فکر وکړي.»
خو د اقتصاد وزارت مسوولین له دې بنديز هغه ښځې مستثنا بولي چې د ملګرو ملتونو په اړوند ادارو کې کار کوي؛ ځکه د دوی په خبره، يادو ادارو ته د فعاليت جواز بهرنيو چارو وزارت ورکړی نه اقتصاد وزارت.
د اقتصاد وزارت ویاند عبدالرحمن حبیب وايي: « اقتصاد وزارت د غیر امارتي ادارو د فعالیتونو او د پروژو د ښه پلي کېدو لپاره د یوه ځانګړي طرزالعمل له مخې، اړینې آسانتیاوې برابرې کړي؛ ترڅو په بېلابېلو برخو کې پروژې په خپل وخت تطبیق او د بشري مرستو پروسې د کړندیتوب ترڅنګ د غیر امارتي او سکټوري ادارو ترمنځ د همکارۍ روحیه لا پیاوړې کړي.»
تېره یکشنبه اقتصاد وزارت یو ځل بیا په نادولتي بنسټونو کې د ښځو د دندو پر درولو ټينګار وکړ او دا يې هم ويلي و چې په دې برخه کې د نادولتي ادارو نه همکاري ښايي د دوی د فعاليت جوازو د لغو کېدو په بيه تمام شي.
