د پاکستان پنجاب ایالت دا ختراباد ښار د پاټک په سیمه کې د داعش ډلې خراسان څانګې مهم او لوړ پوړی قوماندان وژل شوی.
د راپورونو له مخې، د داعش ډلې دغه مهم غړی برهان نومېده چې په زید مشهور و او د پاکستان په پنجاب کې د نامعلومو کسانو له لوري وژل شوی.
په همدې حال کې د افغانستان سولې لپاره د امریکا پخواني ځانګړي استازي د داعش ډلې د دې غړي وژل کېدل ښه خبر بللی.
زلمي خلیلزاد ویلي: « دا له پاکستان څخه ښه خبر دی چې د داعش خراسان یو لوړپوړی قوماندان برهان چې پر زید هم مشهور و، د پنجاب د اختراباد ښار په پاټک سیمه کې وژل شوی دی.»
کارپوهان بیا وايي، له دې بل ستر ثبوت او سند نه شته چې د داعش ډلې مهم غړي په پاکستان کې یو په بل پسې وژل کېږي او دا د دې ښکاروندويي کوي چې دا ډله په پاکستان کې فعال مرکزونه او ملاتړي لري.
د دوی په خبره، داعش نه یوازې افغانستان بلکې د سیمې او نړۍ امنیت ته ګواښ دی او اوس نړیوالو ته په کار ده چې د دې ډلې او ملاتړو پر وړاندې یې جدي ګامونه پورته کړي.
د سیاسي چارشنونکی نجیب الرحمان شمال وايي: « د هرې میاشتې او اوونۍ په تېرېدو سره وینو چې د داعش جګ پوړي مشران او قوماندانان په پاکستان کې وژل کېږي. دا د افغانستان په اړه د پاکستان د هغو ناسمو تورونو ثبوت دی چې وايي داعش په افغانستان کې دی. نړیواله ټولنه باید په دې اړه ګامونه پورته کړي او نړۍ د دې ګډ دښمن له شره خوندي کړي.»
خو ځینې نور بیا وايي، که نړیوال له دغو ثبوتونو سربېره بیا هم په پاکستان کې د داعش ډلې د مرکزونو او ملاتړو پر وړاندې چوپ پاتې شي، نو دا کار به یې بشري خیانت وشمېرل شي.
د دوی په خبره، لکه څنګه چې نړۍ له ترهګرۍ سره د مبارزې شعارونه ورکوي، نو باید په عمل کې یې هم ثابته کړي.
د سیاسي چارو شنونکی توریالی ځاځی وايي: « په پاکستان کې د داعش د جګ پوړي غړیو وژل کېدو په تړاو د نړۍ چوپتیا، له ټولې او په ځانګړې توګه افغانستان سره ستر خیانت دی.»
له دې وړاندې هم د پاکستان په بېلا بېلو سیمو کې د داعش ډلې مهم غړي د ځايي وسله والو له لوري وژل شوي دي. اسلامي امارت هم په دې تړاو کره شواهد او معلومات له پاکستاني لوري سره شریک کړي او له اسلام اباد یې غوښتي چې پر وړاندې یې ګامونه پورته کړي.
