د ناټو دفاع وزیرانو په ناسته کې به په افغانستان کې په اړتیا و بحث وشي.
د ناټو غړو هېوادونو دفاع وزیران سبا په بروکسل کې سره کیني، د نړۍ د نورو هېوادونو سربېره به افغانستان هم ددوی د بحث موضوع وي.
د ناټو سرمنشي چې رسنیو ته يې د ناټو سبا ورځې ناستې په اړه معلومات ورکول وویل، غونډه کې به د افغانستان په اړه یو ځل بیا هغه ژمنې تازه شي چې ترهګرۍ ضد مبارزې برخه کې شوي.
سټولټنبرګ د ننګرهار په هسکه مینه کې په مسجد برید ته په اشارې وویل، چې افغانستان کې به د دې ډلې د ځپلو په تړاو ډاډ ترلاسه کوي.
د ناټو سرمنشي، ینس سټولټنبرګ داسې وویل ((موږ به یو ځل بیا د افغانستان په اړه خپله ژمنه تازه کړو، چې دا هېواد به بیا د نړیوالو ترهګرو په خوندي ځای نه بدليږي))
د ناټو سرمنشي وایي، سبا وزیرانو ته ور په یاد کړي، چې افغانستان د دوی د داعش پر وړاندې د نړیوالې مبارزې برخه ده، چې باید ددغې ډلې د بشپړې ماتې ډاډ ترلاسه شي.
سټولټنبرګ وویل ((زه ټولو وزیرانو ته په افغانستان کې د اړتیاو په اړه معلومات ورکړم، هغه مرستي چې دوی کړي دي یا کوي، په نظامي او روزنیزه برخه کې، ځکه چې موږ باید دا په یاد راوړو چې افغانستان زموږ د داعش پر وړاندې د نړیوالې جګړې یوه برخه ده.))
سټولټنبرګ په افغانستان کې د ولسمشرۍ ټاکنو په تړاو د یوه خبریال پوښتنې ته په ځواب کې په ټاکنو کې پر شفافیت ټینګار وکړ.
ینس سټولټنبرګ زیاته کړه ((شفافیت خورا مهم دی، اړتیا ده، چې د ټاکنو پروسه شفافه او خپلواکه وي، زه د افغان ځواکونو ستاینه کوم، چې په ښه شکل یې ټاکنې خوندي کړې.))
په دغه ناسته کې به د افغانستان سربېره په نورو برخو کې د ناټو په ماموریتونو، عملیاتو او ځانګړي ډول د سوریې په وضیعت بحث وشي.
