د افغان سولې لپاره د امریکا ځانګړي استازي زلمي خلیلزاد کابل کې د ناټو د غړیو هېوادونو سفیرانو سره د افغان سولې پروسې په تړاو خبرې کړي.
خلیلزاد پر ټوېټر لیکلي چې، ناټو غړي هېوادونه افغانستان ته یو ځای راغلي او د حضور په تړاو به هر راز پرېکړه په ګډه کوي.
خلیلزاد ویلي، د سولې پروسه کې د ناټو د غړیو هېوادونو ملاتړ حیاتي ارزښت لري.
خلیلزاد له کندهار بیرته کابل ته راستون شوی او د حکومتي مشرانو او افغان سیاسیونو سره یې ګډه ناسته کړې.
ارګ ویلي، د چهارشنبې په ورځ یو ځل بیا حکومتي مشرانو او یو شمېر پېژندل شویو سیاسیونو له زلمي خلیلزاد سره وکتل او د سولې د روانو هڅو په اړه خپلې اندېښنې او لیدلوري شریک کړل.
په غونډه کې ولسمشر محمد اشرف غني، اجرائیه رئیس عبدالله عبدالله، پخواني ولسمشر حامد کرزي، سرور دانش، ګلبدین حکمتیار، عبد رب رسول سیاف، کریم خلیلي، د ولسي جرګې مشر عبدالرؤف ابراهیمي، صلاح الدین رباني، محمد محقق او محمد عمر داوودزي ګډون درلود.
ارګ ویلي، د حکومتي مشرانو، مهمو سیاسي څېرو او زلمي خلیلزاد ترمنځ خبرې به په راتلونکو ورځو کې هم دوام وکړي.
دا په داسې حال کې ده چې قطر به په روانه میلادي میاشت کې د افغان سولې په اړه د امریکا او طالبانو ترمنځ د خبرو شپږم پړاو او د لسګونه افغان سیاسيونو او طالبانو دویمې غونډې کوربه وي.
ټاکل شوې چې خلیلزاد د افغان سولې په تړاو خبرو لپاره پاکستان ته لاړ شي.
د پاکستان د بهرنیو چارو وزیر شاه محمود قریشي د چهارشنبې په ورځ له خپل امریکايي سیال مایک پامپيو سره په ټيلیفون منلې چې د خلیلزاد سفر به د ترلاسه شویو لاسته راوړنو د لا پرمختګ زمینه برابره کړي.
تر دې وړاندې د امریکا ولسمشر ډونالډ ټرمپ او خلیلزاد ویلي وو چې، پاکستان، افغانستان کې د سولې په تړاو دوه مخی رول لوبوي او رښتینې همکاري یې نه ده کړې.
خلیلزاد چې تر اسلام اباد وروسته ازبکستان، اردن او له طالبانو د لیدنې لپاره قطر ته هم ځي د ټولو سیمه ییزو هېوادونو او قدرتونو په مثبت رول او همکارۍ ټینګار کوي.
