ټاکل شوې له طالبانو سره بین الافغاني خبرې روژه کې پیل شي.
کابل کې د ناټو ملکي استازي ویلي، طالبان بین الافغاني خبرو لپاره چمتوالی لري او تمه ده چې دا خبرې له راتلونکو ولسمشریزو ټاکنو مخکې پیل شي.
طالبانو ویلي، د اوس لپاره کوم پلان نه لري او دا مهال خبرې له امریکا سره روانې دي.
امریکا او طالبانو د خپلو خبرو پایله نه ده اعلان کړې خو کابل کې د ناټو ملکي استازي تمه ښودلې چې طالبان د بین الافغاني خبرو لپاره چمتوالی لري او باور یې ښوولی چې ممکن دا خبرې په روژه کې پیل شي.
نیکولاس کي ویلي، دا خبرې به افغانستان کې د راتلونکو ولسمشریزو ټاکنو مخکې پیل شي.
د افغانستان لپاره د ناټو ملکي استازي نیکولاس کي داسې ویلي ((طالبان د سولې بینالافغاني خبرو لپاره چمتوالی لري او ناټو تمه لري چې د سولې بینالافغاني خبرې تر ولسمشریزو ټاکنو مخکې و شي او ممکن دا خبرې روژه کې پیل شي.))
خو طالبان تر اوسه پورې داسې کوم پلان په نظر کې نه لري او هڅه کوي بین الافغاني ناسته جوړه شي، داسې ناسته چې د پلاوي شمېر پکې کم وي.
د طالبانو سرسخته مخالفین هم اوس ټینګار کوي چې طالبان دې په سیاسي واک کې شریک شي او له دې پرته په افغانستان کې د ټیکاو ټینګښت ناممکنه ده.
ولسمشر غني طالبانو سره د خبرو لپاره په پنځه ورځینۍ جرګه کې د خلکو وړاندیزونه او مشورې واخیستي چې خلک یې پایلو ته په تمه دي، خو ټینګار کیږي چې طالبانو دې مخامخ خبرو ته چمتو کړل شي.
کابل کې د ناټو ملکي اداره وایي، افغانستان کې د سولې او ثبات د ټینګښت په موخه سیمه ییزه او نړیواله اجماع رامنځته شوې او ان د افغانستان ګاونډیان هم په دغه هېواد کې د امنیت او اقتصادي ودې لپاره له طالبانو سره د افغان دولت د سولې د خبرو ملاتړ کوي.
