تېره ورځ د ناټو سرمنشي ینس سټولټنبرګ خبریالانو ته ویلي، د ناټو سازمان به تر هغې په افغانستان کې پوځي حضور ولري چې د ماموریت موخې یې نه وي ترلاسه شوي.
ینس سټولټنبرګ ویلي، د دوی حضور په افغانستان کې شرایطو پورې تړاو لري.
د ناټو سرمنشي تېره ورځ بروکسل کې خبریالانو ته ویلي، افغانستان کې یې پوځي ماموریت د دې لپاره پیل شوی و چې د ترهګرۍ پر ضد جګړه وشي او تر هغې چې ترهګر شته او طالبانو له ترهګرو ډلو سره اړیکې ختمې کړې نه وي، دا ماموریت به دوام ولري.
هغه ویلي، افغانستان کې د ناټو شتون یا وتل په شرایطو پورې اړه لري او هر کله چې شرایط برابر شي، دوی به له افغانستان ووځي.
نوموړي د امریکا او طالبانو ترمنځ شوی تړون مهم بللی او هیله یې ښودلې چې دوحه کې روانې بین الافغاني خبرې به مثبته پایله ولري.
