کابل کې د غوڅ ملاتړ ماموريت طالبان یو ځل بیا ملامت کړي چې د ملکي وګړو څخه د سپر په توګه کار اخلي.
د ناټو مالومات ښيي چې طالبان خپلو جنګياليو ته د هغو کورونو شاوخوا سيمو کې د ګرځېدو لارښوونه کوي، چې هلته ماشومان وي او هوایي بریدونه و نه شي.
کابل کې بيا مدني فعالانو هم په حکومت نيوکه کړې چې د سولې له خبرو سره یو ځای د ملکي وګړو د مرګ ژوبلې په تړاو چوپه خوله دی.
په دې راپور کې د یوې نجلۍ کیسه هم شته چې د کورنۍ غړي یې د هوایي برید قربانیان دي.
کابل کې د غوڅ ملاتړ ماموريت لخوا په خپره شوې اعلاميه کې ويل شوي ، طالبانو تل له افغان مېرمنو او ماشومانو د بشري سپر په توګه استفاده کړې او ملکي مرګ ژوبلې ته يې لاره هواره کړې.
غوڅ ملاتړ ماموريت دجګړې بڼه وېره وونکې او لومړۍ کرښه پېچلې یاده کړې؛ خو طالبان په قصدي توګه د ملکيانو له کورونو په استفاده په افغان اوائتلافي ځواکونو بريدونه کوي ترڅو خپل ځانونه خوندي کړي.
د غوڅ ملاتړ ماموريت ویلي (( موږ د طالبانو د قومندانانو راپورونه تر لاسه کړي، چې خپل جنګياليو ته وايي، د هغو کورونو شاوخوا سيمو کې ګرځئ چې ماشومان پکې وي ترڅو له هوايي بريدونو لاندې را نشئ.طالبان پوهېږي، چې افغان او امريکايي هوايي ځواکونه په هغو ځايونو کې له بريد کولو ډډه کوي، چې هلته ملکي وګړي تر سترګو کېږي.))
طالبانو بیا د ناټو ځواکونو دا ادعا رد کړې او بهرني ځواکونه ملامت بولي چې په هوایي بریدونو کې ځینې وخت د دولت تر حاکمیت لاندې سیمو کې بریدونه کوي چې ملکي وګړي یې قرباني وي.
د روانې اونۍ پیل کې امریکايي ځواکونو په کندز کې هوايي بریدونه وکړل چې څوارلس تنو ملکي کسانو ته په کې مرګ ژوبله واوښته په دغو بریدونو کې یوه ټپي شوې مېرمن وايي، طالبان يې په کور کې پټ و چې هوايي بريد پرې وشو.
له دې سره کابل کې مدني فعالانو د ملکي وګړو د مرګ ژوبلې د غندنې په غبرګون کې را ټول شوي وو، او په حکومت يې نيوکه وکړه ،چې ولې د ملکي وګړو مرګ ژوبلې ته چوپه خوله پاتې دی.
ناټو وايي، ډېری نسلونو ټول ژوند په دې تاوتريخوالي کې تېر کړ او اړتيا ده ، چې دا تاوتريخوالی نور پايته ورسېږي او افغانان سولې ته ورسیږي.
د ملکي مرګ ژوبلې دا خبره په داسې مهال کېږي ، چې شپږ مياشتې وړاندې يوناما په دغه برخه کې د ۵۲ سلنه زياتوالي خبر ورکړی و.
راپور : محبوب الهی
