د سویل ختیځ زون د سرې میاشتې مشر الیاس خیل ناصري وایي، تر دا مهاله یې اړوند شپږو ولایتونو کې د بېلابېلو هېوادونو شوې مرسته پر زرګونه کورنیو ویشلې ده.
ناصري وايي،د المان مرستې ویشل شوي، د ترکیې د بشري مرستو ویش روان دی او نږدې راتلونکې کې به د یو شمیر نورو هېوادونو مرستې هم را ورسیږي.
ناصري زیاته کړه:« دغه مرسته کوونکي چې له موږ سره یې ژمنې کړي،څه توکې یې را رسیدلي او څه پر لاره دي.د چین اوړه را رسیدلي،اوس مشران د ولایتونو په تقسیم مصروف دي او قطر هم ژمنه کړې ده.»
تازه د سرې میاشتې له لوري د ترکیې هېواد بشري مرسته لوګر او پکتیا کې پر ۶۰۰ اړمنو کورنیو وویشل شوه او نږدې ورځو کې به یې خوست کې هم د ویش بهیر پیل شي.
سویل ختیځ زون کې د ترکیې استازی رفیع مومند وايي:« خوست ولایت کې هم د ترکیې هېواد بشري مرستې د سرې میاشتې له لوري پر درې سوه کورنیو ویشل کیږي،چې نږدې ورځو کې به یې د ویش بهیر پیل شي.»
د اړمنو کورنیو غړي،چې د پکتیا لرې پرتو سیمو کې اوسیږي،د بشري مرستو ترلاسه کولو ته خوشاله دي،خو له اسلامي امارته او نړیوالو مرستندویه بنسټونو د کار موندنې غوښتنه کوي.
د پکتیا یو تن اوسیدونکی وايي:«دا مرستې زموږ دایمي درد نه شي دوا کولی. له اسلامي امارته،اسلامي او نورو هېوادونو غواړو،چې موږ ته کار پیدا کړي،ترڅو پر ځان بسیا شو.»
د پکیتا یو بل اوسېدونکی بیا وايي:«موږ ته که دې کار زمینه برابره شي. ترکیې ته هم ځو،غریب خلک یو،کار روزګار نه لرو. موږ به مننه ترې وکړو،چې څوک راته کار پیدا کړي.»
د سویل ختیځ زون د سرې میاشتې مسئولین وایي،د اړمنو کورنیو په پیژندلو کې له پوره دقت کار اخلي او له همدې امله ډېری هېوادونه غواړي،چې د دوی له لارې بشري مرستې وویشي.
