کابل کې نن د غوڅ ملاتړ ماموريت عمومي قومندان جنرال سکاټ مېلر له افغانستان څخه د ناټو ځواکونو وتلو او د دوی راتلونکو پلانونو په اړه خبريالانو ته مالومات ورکړل.
په یاده خبري ناسته کې جنرال سکاټ مېلر وویل، له افغانستان څخه د ځواکونو ويستلو ته تیاری نيسي او له وتلو وروسته به ټولې اډې افغان ځواکونو ته وسپاري.
مېلر وویل:(( کله چې موږ خپل ځواکونه صفر شمېرې ته ورسوو، موږ به ټول بېزونه دفاع وزارت او نورو افغان ځواکونو ته وسپارو، او دا به ټول بېزونه وي.))
مېلر دغه راز پر طالبانو غږ وکړ چې د تړون له مخې بايد له القاعده سره خپلې اړيکې پرې کړي.
په دې تړاو جنرال سکاټ مېلر وویل: (( طالبان بايد القاعده سره خپلې اړيکې پرې کړي، دا هغه څه دي چې دوی يې ژمنه کړې ده، نړۍ هم د دې تمه لري، چې دا اړيکې پرې شي.))
دغه څلور ستوريزی امريکايي جنرال ګواښ کوي که د ځواکونو انتقال پر مهال پرې بريد وشي بې ځوابه يې نه پرېږدي.
ناټو بیا وايي، اوس مهال پر دې کار کوي، چې کوم نظامي تجهيزات افغان امنيتي او دفاعي ځواکونو ته ورکړي او کوم له ځانه سره يوسي.
