د قطر په پلازمېنه دوحه کې د اسلامي امارت پلاوي او امریکايي چارواکو ترمنځ په وروستۍ ناسته کې پر ګڼو دوه اړخيزه موضوعاتو خبرې شوي دي.
له ناستې وروسته د افغانستان بهرنیو چارو وزارت په یوه خبرپاڼه کې ویلي، د نورو مسايلو تر څنګ د افغانستان پر بانکونو لرې شوي محدودیتونه یو مثبت پرمختګ بلل شوی.
خو د امریکا بهرنیو چارو وزارت ویاند متیس میلر بیا د اسلامي امارت د خبرپاڼې د دې برخې په تړاو حیرانتیا ښودلې او ویلي دي، چې پر سرپرست حکومت د امريکا ټول لګول شوي بندیزونه لا هم پر خپل ځای دي.
میلر زیاته کړې:« زه به ووایم چې ما هغه اعلامیه وکتله او نورو خلکو هم لیدلې، خو نه پوهیږم دوی د څه په تړاو خبرې کوي؟ هیڅ داسې بندیزونو چې موږ ترې خبر یوو او کوم چې موږ لګولي، نه دي لرې شوي. نو موږ پر هغو خبرو حیران شو.»
ميلر د اسلامي امارت رسمیت پيژندو په تړاو د خبریالانو پوښتنو په ځواب کې ویلي، چې سرپرست حکومت په دوامداره توګه د رسميت ترلاسه کولو هڅه کوي، خو په خبره یې د خپلو کړنو او د بشري حقونو د نقض له امله داسې موقف نه لري، چې له مخې يې ياد حکومت پر رسمیت په وپېژني.
میلر زیاته کړې:« زه دلته نه وایم چې د رسمیت پیژندلو شرطونه څه دي؟ خو زه باید ووایم لکه څرنګه چې تېر کې موږ ویلي دي، طالبان په دوامداره توګه د رسمیت او مشروعیت په لټه کې دي. خو له خلکو سره د دوی د رویې او بشري حقونو د نقض په ګډون د ځینو موضوعاتو له امله موږ اوس دې موقف کې نه یو، چې پر رسميت پېژندنه يې فکر وکړو.»
مېلر دوحه کې د افغانستان او امریکا ترمنځ وروستۍ ناستې په تړاو ویلي، چې یو ځل بیا یې له اسلامي امارت غوښتي ترڅو د افغانستان خاوره سیمې او نړۍ ته د ترهګریزو بریدونو لپاره ونه کارول شي.
هغه زیاته کړې:« لکه څرنګه مو چې له طالبانو سره په نورو ناستو کې ترې غوښتي، په دې وروستۍ ناسته کې مو هم په روښانه ډول ویلي، چې موږ باور لرو او دا اړتیا ده چې طالبان دې ته اجازه ورنه کړي ترڅو د افغانستان خاوره په سیمې او يا کوم بل ځای کې د ترهګریزو بریدونو لپاره وکارول شي.»
د دې موضوعاتو ترڅنګ د امریکایي چارو وزارت وياند منلې، چې د افغانستان له سرپرست حکومت سره امريکايي وګړي بندیان دي خو د هغوی د شخصي راز له امله نشي کولی د شمېر او وضعیت په تړاو یې مالومات ورکړي.
