دغه لېدنه کې دواړو اندېښنه ښودلې،چې افغانستان باید د سیمې او نړۍ لپاره پر ترهګریز ګواښ بدل نه شي او کابل باید له ترهګرو ډلو سره اړیکې ونه ساتي.
دغه راز دواړو لوریو د افغان ښځو او بشري وضعیت په اړه هم اندیښنه ښودلې او له افغانانو سره پر بشري مرستو یې ټینګار کړی دی.
دواړو ټينګار کړی،چې پراخ او هر اړخیز سیاسي بهیر دې رامنځ ته شي او بشري او د ښځو حقونه دې خوندي کړي.
همدراز دواړو مشرانو پر دې هم ټینګار کړی،چې په اوسنیو شرایطو کې ټول شموله حکومت ته اړتیا ده،چې باید کار پرې وشي .
خو کارپوهان بیا وايي، هغه مهال به افغانستان د ترهګرۍ پر ځاله بدل شي،چې نړۍ ترې مخ واړوي او اوسنی افغان حکومت اساسي قانون رامنځ نه کړي.
دوي وايي،اوس نړیوال مسوولیت لري،چې په دغه برخه کې له افغان دولت سره همکاري وکړي او د سیاسي، اقتصادي او نظامي بحرانونو رامنځ ته کیدو مخه پر ګډه ونیسي.
سیاسي فعال کمال ناصر اصولي وايي:« هغه وخت کې د دې امکان شته دی،چې افغانستان د ترهګرو ډول پر پټن ځای بدل شي،چې نړۍ موږ ته شا کړي او افغان سرپرست دولت اساسي قانون جوړ نه کړي انارشیزم خپور شي او دولت داري له منځه ولاړه شي. د داسې یوه حالت رامنځ ته کول بیا لوی ناورین دی،هم د افغانانو لپاره او هم د سیمې لپاره. اوس نړیوال مسوولیت لري،چې افغانان په دغه مسله کې یوازې پرې نږدي او له افغان دولت سره همکاري وشي.»
ځينې بیا په دې باور دي،چې له دې وروسته افغانستان هېڅ کله هم د ترهګرو پر ځاله نه شي بدلیدلی او افغان حکومت باید د یوه بې طرفه بهرني سیاست پرمټ له نړۍ سره د خبرو لاره خلاصه کړي.
د سیاسي چارو کارپوه هاتف مختار وايي:« هر هغه کنفرانس،چې د افغانستان لپاره جوړیږي او د افغانستان د ملي منافعو په رڼا کې وي، زموږ د ملت لپاره غوره ده،چې د خبرو اترو لار له نړۍ خلاصه کړو، نړۍ باید متوجه شي،چې له دې وروسته افغانستان د هېڅ یوه ترهګر لپاره نه کور دی نه ځاله ده. افغانستان په یوه بې طرفه سیاست کولای شي،چې له نړۍ سره د خبرو اترو لاره خلاصه کړي .»
په ورته مهال د ازبکستان ولسمشر خبر ورکړی دی،چې هېواد یې له اسلامي امارت سره د خبرو لپاره د نړیوالې ډلې د رامنځته کولو نوښت په لاس کې اخیستی او له دغې لارې به له کابل سره خبرې پیل شي.
