Skip to content
افغانستان کې د خوړو نړېوال پروګرام (ډبلیو.ایف.پي) مشرې ماري ایلن مک ګراوټي له شمشاد سره په خبرو کې ویلي، پر افغانانو اوس هم بشري ناورین حاکم دی او شااوخوا ۲۰ میلیونه وګړي سالمو خوړو ته لاسرسی نه لري.
ګراوټي وایي،د افغانستان اوسنۍ وضعیت په یوه شپه کې نه دی رامنځته شوی،بلکې له تېرو څو کلونو راهیسې بېلابیلو لاملونو دې وضعیت ته لمن وهلې.
ګراوټي زیاتوي:« کله چې د بهرنیو بیارغونې ملاتړ بند شو، موږ له بشري اړخه په لویه کچه مرستې پیل کړي دي. موږ په تېرو ۱۵ میاشتو کې د بشري مرستو رسولو ستر کمپاین ترسره کړ او موږ له تېرې جنورۍ میاشتې راهیسې ۲۲ میلیونه افغانانو ته رسیدنه کړې ده.»
ګراوټي راتلونکي ژمي لپاره د خپلو پلانونو په اړه وویل،چې غرنیو سیمو ته وار د مخه له ۱۰۰ زرو ټنو زیات خوراکي توکي استول شوي او زیرمه شوي دي.
دغه راز ګراوټي وايي، د پیسو له کمښت سره مخ دي او نه شي کولی ټولو اړمنو افغانانو ته ورسیږي
هغې زیاته کړه:«زموږ لپاره دا تل ستونزه ده، موږ له اوس تر راتلونکې مې میاشتې د یو اعشاریه ۲ میلیارده ډالرو کمښت سره مخ یو. افغانستان کې ۲۰ میلیونه خلک سالم خواړه نه خوري او موږ باید څومره ډېرو ته چې امکان ولري رسیدنه وکړو، په ځانګړي ډول هغو شپږ میلیونو خلکو ته چې د ناسلمو خوړو په شدید وضعیت کې دي.»
افغانستان کې د خوړو نړیوال پروګرام مشرې د شمشاد د دې پوښتنې په ځواب کې چې د روان بشري ناورین د ختم لپاره باید څه وشي داسې وویل:«زما په نظر اړتیا ده،چې د اقلیمي بدلون د ستونزو لپاره باید حل لار ولټول شي، په اوس کې د څښاک پاکې اوبه کمې دي، سیلابونه ورځ تر بلې شدید کیږي، وچکالي سخت پړاو ته داخلیږ، نو اړتیا ده،چې موږ له کروندګرو او مالدارانو سره کار وکړو، ترڅو د اقلیمي بدلونه له دغو ستونزو سره ځانونه عیار کړي. اوس کې باید کرنه د افغانستان د اقتصاد په چلولو کې تر ټولو ستره ونډه ولري، ځکه د افغانستان ډېر شمېر خلک په کلیوالي سیمو کې اوسي.»
ګراوټي زیاتوي، افغانستان کې له تېرو لسیزو جګړو ښځې کونډې کړي،چې اړې دي د ډوډۍ پیدا کولو لپاره کار وکړي.
د مک ګراوټي پر وینا،کله چې د یوه هېواد نیمایي نفوس له فعالیتونه منع شوي وي،هېڅ ډول ناورین نه شي مهاریدلی.
