د امریکا د پوځ مرکزي قوماندانۍ (سنتکام) پخواني قوماندان کېنټ مککېنزي په يوه مرکه کې ویلي، له افغانستانه د امریکايي ځواکونو له وتلو وروسته په دغه هېواد کې داعش او القاعده ځواک من شوي دي.
مککېنزي زیاته کړې، دې ډلو په افغانستان کې دننه او بهر د لويو بريدونو ترسره کولو وړتيا پيدا کړې او په خبره يې کولی شي په راتلونکي کې د امريکا امنيت ته ګواښ پېښ کړي.
مککېنزي پر اوکراین د روسیې د برید لامل له افغانستانه د امریکايي ځواکونو وتل بللی او زیاتوي، د امریکايي ځواکونو وتلو د روسیې ولسمشر ولادیمیر پوتین ته پر اوکراین د بريد کولو جرئت ورکړ.
هغه په دې اړه وايي: « له افغانستانه د ځواکونو د ایستلو پرېکړه زما سپارښتنه نه بلکې د ملي مشرتابه له خوا شوې وه. موږ به دعا کوله چې امریکایان او یو شمېر افغانان مو ژوندي را و ایستل. دا هغه څه دي چې تل به مې په ياد وي. ځواکونو مو خپله دنده په ښه توګه پرمخ یوړه او اړتیا هم وه. د ځواکونو له ايستلو سره سم داعش او القاعده ډلې پر امریکا د برید لپاره ځواکمنې شوې او د دې ترڅنګ د امریکايي ځواکونو له ناڅاپي وتلو وروسته، دېکتاتورانو لکه ولسمشر پوتین زده کړل چې په ډېره بې باکۍ پر اوکراین برید وکړي.»
د سرپرست حکومت اړوند چارواکو زموږ پرله پسې اړیکو ته ځواب رانه کړ، خو همدا تېره اوونۍ سرپرست حکومت په يوه اعلامیه کې وویل، د داعش پر وړاندې یې جدي مبارزه کړې او دغه ډله يې له پښو غورځولې ده.
د سرپرست حکومت له خوا خپره شوې اعلامیه کې ادعا شوې چې د داعش پټنځایونه د ډیورنډ فرضې کرښې ها غاړه د پاکستان تر کنټرول لاندې سيمو، بلوچستان او خيبرپښتونخوا کې دي.
د سیاسي چارو کارپوهان د تل په څېر ورته ادعاوې پر سرپرست حکومت د فشار راوړلو وسيله بولي او په خبره يې، د امریکا په ګډون یو شمېر هېوادونه په دې توګه د افغانستان په داخلي چارو کې د مداخلې اراده لري.
د سیاسي چارو شنونکی سمیر انګار وايي: « زموږ ځینې ګاونډي هېوادونه غواړي چې د افغانستان په سر له نړیوالې ټولنې امتیازونه ترلاسه کړي او یا هم پر اوسني نظام فشار وارد کړي ترڅو د هغوی له غوښتنو سره سم چلن وکړي او یا هم د افغانستان په کورنیو چارو کې لاسوهنې ته زمینه برابر شي.»
ځيني نور بیا باور لري چې یو شمېر امریکايي پوځي چارواکي په افغانستان کې د خپل حضور پرمهال د خپل ناسم مدیریت او کمزورتیاوو پټولو او د امريکا حیثیت ساتلو په موخه ورته څرګندونې کوي.
د سیاسي چارو شنونکی حکمتالله حکمت وايي: « په افغانستان کې د امریکا او امریکايي جنرالانو ماتې په نړۍ کې د امریکا زبرځواکي او هژموني وننګوله، د امریکا مخالفان یې د دې هېواد پر وړاندې وهڅول او نړیوالې ټولنې ته یې دا ذهنیت پیدا کړ چې امریکا هم لکه د نورو امپراتوریو په شان ماتېدونکې او ورکېدونکې ده. همدا لامل دی چې امریکايي جنرالان او سیاستوال وخت نا وخت یو پر بل نیوکې کوي او یا هم په افغانستان کې د ترهګرۍ د بیا راژوندي کېدو خبرې کوي.»
دا لومړی ځل نه دی چې پخواني او اوسني امریکايي چارواکي په افغانستان کې د داعش او نورو ډلو د موجودیت او لوېدیځ ته يې د احتمالي ګواښونه په اړه څرګندونې کوي.
له دې وړاندې د امریکا د استازو جرګې د بهرنیو اړیکو کمېټې مشر مایکل مککال هم په افغانستان کې د داعش او القاعده شبکې د موجودیت ادعا کړې وه.
