امریکا د طالبانو له ټینګار او د سولې د روانو خبرو سره سره په پلان کې نه لري چې له افغانستان څخه ژر ووځي.
د امریکا دفاع وزیر جیمز مټیس ویلي، هڅه کوي د افغانستان جګړې ختمولو لپاره لارې ومومي، خو دا په دې مانا نه ده چې له افغانستان څخه به ډېر ژر ووځي.
مټیس ویلي، که له افغانستان څخه ووځي نو دغه هېواد به د ترهګرو ډلو په پټنځای بدل شي او پر امریکا به بریدونه وکړي.
هغه ویلي، د بهرنیو چارو وزارت خپلې ټولې هڅې کوي چې د افغانستان جګړې د خبرو له لارې حل کړي او په دې تړاو د ملګرو ملتونو په ګډون د سیمې هېوادونو ونډه مهمه ده.
د دفاع وزیر مټیس څرګندونې داسې مهال کېږي چې افغانستان کې د سولې مذاکراتو لپاره هڅې ګړندۍ شوي او د امریکا ځانګړي استازي خلیلزاد هم ویلي چې تمه لري له ولسمشریزو ټاکنو دمخه د سولې هوکړې ته ورسېږي.
طالبانو بیا ټینګار کړی چې د سولې خبرې به هغه مهال پیل شي چې بهرني ځواکونه د وتلو مهال وېش اعلان کړي.
