د رويټرز خبر له مخې د امریکا د پوځ د لوی درستیزانو مشر، جنرال مارک میلي کابل ته د سفر پر مهال ویلي، د سولې خبرې به اوس تر بل هر وخت ښې پایلې ولري او ډېر نږدې راتلونکي کې به ترسره شي.
مارک میلي په سپټمبر میاشت کې د امریکا د پوځ د لوی درستیزانو مشر وټاکل شو او له دندې د پیل وروسته دا یې افعانستان ته لومړی سفر دی.
ميلي ویلي، زه په تېرو اتلس کلونو کې افغانستان کې ښکېل وم، تر بل هر وخته اوس د سولې ښو پایلو لپاره چانس زیات دی.
میلي زیاته کړه، موږ به په نږدې راتلونکي کې کامیاب مذاکرات ولرو.
میلي دغه څرګندونې د چهارشنبې په ورځ کابل ته د سفر پر مهال کړي دي.
میلي خبریالانو ته ویلي، ډېر کله مو افغانستان کې داسې څه لیدلي چې دوه ګامه به مخته تلو خو یو ګام به شاته تلو.
د رویټرز خبر له مخې مېلي ویلي، مذاکرات دوام لري.
میلي ویلي، د سرتېرو د کمولو په تړاو هېڅ ډول وروستۍ پرېکړه نه ده شوې خو دا امکان شته چې سرتېري ۸۶۰۰ ته راکم شي.
