له کندهار څخه اروزګان ولایت ته پرغځېدلې لویه لار هره ورځ لسګونه موټر او مسافر تګ راتګ کوي.
د یادې لارې موټر چلوونکي وايي، د لارې خرابوالي له امله یې ډېر کله موټر خرابېږي او مسافر پر خپل وخت تر منزل نه شي رسولی.
دوی زیاتوي، چې د سېلابونو او بارانونو له امله د دقیقو لاره ساعتونو ته اوږده شوې.
یو تن موټر چلوونکی رازمحمد وايي: «لاره دومره خرابه ده، چې په یوه میاشت کې مې دوه جوړې ټایرونه او جمپین خراب کړل. دا لاره د دې نه ده، چې ناروغان پرې انتقال کړي؛ باید ژر تر ژره جوړه شي.»
د کندهار – اروزګان لارې یو بل موټر چلوونکی فیض الل بیا وايي: « دا لاره ډېره خرابه ده، اوبو او سېلابونه په بشپړه توګه له منځه وړې.»
په ورته وخت کې د اروزګان ځینې اوسېدونکي وايي، د لارې خرابوالي له سختو ستونزو سره مخ کړي او ډېر کله خپل بېړني ناروغان پر وخت کندهار ښار ته نه شي رسولی.
دوی پر سرپرست حکومت غږ کوي، چې د دې لارې د جوړېدو لپاره لاس په کار شي او خلکو ته د تګ راتګ په برخه کې اسانتیاوې رامنځته کړي.
د کندهار – اروزګان لارې یو تن مسافر میرزا محمد وايي: « لاره ډېره خرابه ده، خو کار یې ډېر سخت نه دی، یوازې د حکومت همکارۍ ته اړتیا ده. د یوه ساعت لاره درېیو ساعتونو ته اوږده شوې او له دې امله ناروغان په ډېر تکلیف تر کندهاره رسوو.»
د همدې لارې بل مسافر عبدالقاهر هم ورته شکایت لري او وايي:« لاره دومره خرابه ده، چې تېرځل زما د راتګ پرمهال یو کوچنی ناروغ په لاره ومړ. د باران او سېلاب راوتلو پرمهال هر خوړ ته درې څلور ساعته تم کېږو، حتا ځینې کسان د شپې هم پاتې شول. دا لاره د عاجلو ناروغانو لپاره سل په سلو کې خطر لري.»
بله خوا، د ټولګټو چارو وزارت مسوولین وايي، د دې لارې د جوړېدو کار روان دی او دا مهال د کندهار ولایت د شاه ولیکوټ ولسوالۍ د ویان ترمانده پورې چارې پای ته رسېدونکې دي.
په سوېلي زون کې د یاد وزارت د پروژو تخنیکي مسوول شېرحسن خوشیوال وايي:« د دې لارې بودیجه د اسلامي امارت د رهبر له خوا منظوره شوې، کار یې پيل شوی، چې اوس له سرکاري باغ څخه تر ویان مانده پورې ټول پلچکونه، واشونه او ډمبر رغول شوي او پر شولډر کار روان دی. هڅه کوو له شاه ولیکوټ ولسوالۍ څخه ها خوا ۲۰ کیلومټره خامه سړک هم د ژمي له راتګ واړندې بشپړ کړو.»
د کندهار- اروزګان د لويې لارې ترڅنګ د یو شمېر ولسوالیو لارې هم خرابې دي. په دغو لارو تګ راتګ کوونکي مسافر شکایت کوي، چې له زیاتو ستونزو سره مخامخ دي.
