د سمنګان- مزار او سمنګان- بغلان ترمنځ لاره چې هر ورځ پرې زرګونه نقلیه وسایط تګ راتګ کوي، که څه هم د سمنګان ټولګټو چارو ریاست له لوري څه نا څه رغول شوې، خو موټر چلوونکي یې پر اساسي جوړېدو ټینګار کوي.
یو تن موټرچلوونکی وايي: « له دولته مو هیله دا ده چې دغه سړکونه ترمیم کړي، ځکه له پاټکه چې رااوړې پلونه او موړې ډېرې خرابې دي، موټر هم خرابوي او نورې ستونزې هم زېږوي او دا اوس چې کوم کارونه روان دي په دې هم موږ راضي یو.»
یو بل موټر چلوونکی وايي: « هیله مو همدا ده چې دا سړکونه جوړ کړي، ځکه دا د یوه هېواد بنسټیزه برخه ده، که سړکونه جوړ نه وي نو ستونزې بیخي زیاتېږي.»
د سمنګان ټولګټو چارو رئیس محمد رحمان محمدي وايي، په تېر یوه کال کې يې د يادې لارې د رغولو ترڅنګ يو شمېر نورې عامه پروژې هم تطبيق کړي او ډاډ ورکوي، چې د لويو لارو په اړه د خلکو شکايتونو ته به پر وخت رسېدنه وکړي.
محمدي زیاتوي: « د کال په اوږدو کې چې د ټولګټو وزارت کوم اساسي کارونه کړي په هغې کې یو هم د ایبک- مزار شریف د سړک ۴.۶ کیلو مټره بیا رغونه وه چې دا سړک تر یوه ځایه پورې جوړ شو. دویمه پروژه د ایبک – پلخمري ترمنځ د سړک بیا رغونه وه چې له یوه شخصي شرکت سره یې تړون شوی و او دا هم جوړ شو. درېیمه پروژه چې په عمومي مسیر کې ده هغه د حضرت سلطان پل و چې له خطر سره مخ و او دې لپاره پل پایه جوړه شوه چې نږدې پنځه میلیونه افغانۍ لګښت پرې راغی.»
نوموړی وایي، د سږنۍ ملي بودیجې له منظورېدو وروسته به د سمنګان په اړوند ساحو کې اته رغنیزې پروژې پیل شي، چې ورسره به د خلکو ستونزې تر زیات بریده حل شي.
د محمدي په خبره: « د ۱۴۰۳ کال لپاره موږ اته پروژې په پام کې لرو چې زموږ په پراختیايي پلان کې هم شاملې دي، په دې هېله چې بودیجه یې منظوره شي. په دې کې مهم د تاشقرغان تنګی دی چې هلته یوه استنادي دېوال ته اړتیا ده او نږدې راتلونکي کې به ان شاءالله لومړی همدا کار کېږي، ځکه چې دا لاره له خطر سره مخ ده، همداراز کوم پلونه چې ترمیم ته اړتیا لري دا به هم ان شاءالله ترمیموو.»
که څه هم مسوولین دا او دې ته ورته لویو لارو بیارغونې خبر ورکوي، خو بیا هم د سېلابونو راوتلو پر مهال مسافر له ستونزو شکایت کوي او غوښتنه کوي، چې پر بنیادي او اساسي ډول دې يې ستونزې حل شي.
