د پاکستان جمعیت علمای اسلام ګوند مشر وایي، په خيبرپښتونخوا کې هېڅ ډول حکومت نهشته او په خبره يې، که وي هم پر دې سیمه حاکمیت نهلري.
مولانا فضل الرحمن د پاکستان پارلمان ته په خبرو کې ويلي، د خیبرپښتونخوا په سویلې ولسوالیو کې ټول واک د حکومت په ځای له وسلهوالو ډلو سره دی او خلک خپل ماشومان د هغوی له وېرې ښوونځیو ته نهشي لېږلی.
مولانا فضل الرحمن زیاته کړې: « زموږ په سیمو کې حکومت نهشته؛ د خيبرپښتونخوا د سوېلي ولسواليو په لرې پرتو سيمو کې په جوماتونو او بېټکونو کې وسله وال موجود دي، څوک له ويرې خپل ماشوم ښوونځي ته نهشي لېږلی او د ژوند ټولې چارې په ټپه ولاړ دي.»
مولانا فضل الرحمن دغه راز وایي، د دوی په سیمو کې د وسلهوالو ډلو موجوديت له امله ټول کاروبارونه په ټپه ولاړ دي او ځایي خلک اړ شوي چې خپلې مېنې پرېږدي. هغه د پاکستان پر حکومت نیوکه کړې چې د خیبرپښتونخوا پر روان وضعیت یې سترګې پټې کړې دي.
د جمعیت علمای اسلام ګوند مشر په دې اړه ویلي: « زه له دېره اسماعیل خان سیمې سره تړلی یم. ټانګ، بنو او لکي مروت هم زما سیمې دي. زه له دغو سیمو رایې اخلم، خو تاسې باید خبر اوسئ چې زموږ په سیمه کې کاروبارونه په ټپه درېدلي دي، په لوي شمېر کې خلک کډې کوي مګر حکومت په دې هېڅ خبره نه کوي چې په هېواد کې څه روان دي.»
د دوشنبې په ورځ په پاکستان کې د حکومت اپوزیسیون مشر محمود خان اڅکزي هم هلته روان وضعیت د اندېښنې وړ وباله او ویې ویل، اړتیا ده چې په پاکستان کې لنډمهاله حکومت جوړ او رڼې ټاکنې ترسره شي.
نوموړي دغه راز وړاندیز کړی و چې پاکستان باید د قانون او ډیموکراسۍ پر بنسټ اداره شي؛ داسې چې په کې عدلي نظام خپلواک وي، رسنۍ په کې ازاد فعالیت ولري او پوځ يې له سیاسي چارو لرې وساتل شي.
د سیاسي چارو شنونکی شهسوار سنګروال وايي: « واقعیت دا دی چې په دغو سیمو کې د پاکستان حکومت شته نه. په دې وروستیو کې نه یوازې عام ولس ځورول کېږي بلکې د دینې علماوو سر او مال هم نه دی خوندي.»
د سیاسي چارو شنونکی اسماعیل ځدراڼ وايي: « هلته اوس د ولس محرم خلک را اوچت شوي. دا هغه کسان دي چې پلرونه او مشران یې د پاکستان پوځ په شهادت رسولي. دوی د پاکستاني رژیم د ظلم پر وړاندې راپورته شوي دي.»
د چارو ځینې نور څارونکي بیا وایي، په خیبرپښتونخوا کې له کلونو راهیسې پاکستان خپل حاکمیت له لاسه ورکړی او دا څه هغه سیاستوال ښه درک کولی شي چې هلته له روان وضعیت خبر وي.
د سیاسي چارو شنونکی معین ګل څمکنی وايي: « د دې لپاره چې د پاکستان حکومت وکولی شي د خپلو سیمو امنیت ټینګ کړي، له افغانستان سره به یې هم اړیکې روغې شي او دواړه هېوادونه به په سیاسي او اقتصادي برخو کې پرمختګونه وکړي.»
په وروستيو کې د خيبرپښتونخوا په سوېلي ولسواليو او قبايلي سيمو کې ناامنیو بیا زور اخستی. تازه د خیبر پښتونخوا په شمال لوېدیځ کې په یوه بازار کې د چاودنې له امله نهه تنه چې دوه پولیس سرتېري او پنځه ولسي وګړي په کې شامل دي، وژل شوي او ۲۲ نور ژوبل شوي دي.
د سیمې پولیس وايي، چاودنه په لکي مروت کې شوې. دا په تېرو څلورو ورځو کې په قبايلي سيمو کې دویمه خونړۍ چاودنه چې پراخه مرګ ژوبله هم اړوي.
