په پاکستان کې د يوه غير عادلانه اقدام له مخې د پنجاب ايالتي حکومت پرېکړه کړې چې له دې وروسته به خيبر پښتونخوا ته د غنمو لېږلو ته اجازه نه ورکوي.
دې پرېکړې په خيبرپښتونخوا کې سملاسي د اوړو بيې لوړې کړې او ځايي اوسېدونکي يې چې افغانستان سره د ټرانزيټي لارو بندښت له امله وار دمخه اقتصادي ستونزو سره مخ دي، اوس له سختو ننګونو سره مخ کړي دي.
د پنجاب دا پرېکړه د ځینو پاکستاني ګوندونو له غبرګون سره هم مخ شوې. د جمعيت علمای اسلام ګوند مشر دا پرېکړه د پاکستان له اساسي قانون سره په ټکر کې بولي او وايي، د خيبرپښتونخوا له اوسېدونکو سره توپيري چلن کېږي.
مولانا فضل الرحمن زیاته کړې: « له پنجاب څخه خيبرپښتونخوا ته د غنمو د لېږد بندیز غیرقانوني دی. د پنجاب حکومت له لوري خیبرپښتونخوا ته د غنمو د لېږد بندیز د پاکستان له اساسي قانون او د بشري حقونو له اصولو سرغړونه ده.»
مولانا فضل الرحمن وېره څرګنده کړې چې دا ډول پرېکړې او محدوديتونه به پر خيبرپښتونخوا سربېره، ټول پاکستان کې ستونزې لا ډېرې کړي او له همدې امله يې د ژر بېرته لغو کېدو غوښتنه کړې.
فضل الرحمن په دې اړه ویلي: « د خوراکي توکو پر لېږد داسې محدودیتونه نه یوازې قانوني او اداري ستونزې جوړوي بلکې د خلکو حقونه هم تر پښو لاندې کوي او باید ژر تر ژره حل شي.»
شنونکي تېر ته په کتو باوري دي چې پاکستان له پښتنو سره توپيري چلن کوي او غواړي د پنجاب حکومت د دې تازه پرېکړې پر بنسټ، د خپلو غوښتنو او اهدافو د تعقيب لپاره په خيبرپښتونخوا کې کړکېچ لا زيات کړي.
د سیاسي چارو شنونکی د شهسوار سنګروال وايي: « زه فکر کوم دا اقدام د دې خبرې څرګند ثبوت دی چې د پاکستان حکومت یا د پنجاب ایالتي حکومت غواړي په دې سیمه کې کړکېچ ته لاره هواره کړي. دوی غواړي دلته هم اقتصادي ستونزې جوړې کړی او هم جګړې. دوی دا کار د دې لپاره کوي چې د پښتونخوا پر خلکو فشارونه زیاته کړي.»
له دې وړاندې د خیبرپښتونخوا وزیر اعلی هم د پنجاب حکومت دغه پرېکړه غندلې وه او ویلي یې وو چې له ورته توپيري چلن دې ډډه وشي.
