ګڼې ملي او نړیوالې ادارې په نورستان کې د ورستیو سېلاب ځپلو مرستې او ژغورنې ته ورغلي.
د ملګرو ملتونو سازمان ویاند ویلي، دغو سېلابونو تر دې دمه د څلوېښتو کسانو ژوند اخستی، ګڼ نور ټپیان او تری تم دي چې په خبره یې، ورته د رسېدنې لپاره د ژغورنې او موندنې علمیات پیل شوي دي.
سټیفن دوجاریک ویلي، د همکارو ادارو ګرځند روغتیايي ټیمونه اغېزمنو شویو سیمو ته رسېدلي او هلته یې لومړني ګامونه پورته کړي دي.
د ملګرو ملتونو سازمان ویاند ویلي: « ډېرو اغېزمنو سیمو کې د موندنې او ژغورنې عملیات روان دي او زموږ د بشري مرستو شریکانو هم پېښې ته د رسېدنې په موخه خپلې ارزونې او پلان جوړول پیل کړي دي. د بشري مرستو په برخه کې زموږ لومړیتوبونه د لنډمهاله سرپناوو برابرول، د خوراکي توکو مرسته، روغتیايي خدمتونه، د کورنیو اړین توکي او رواني ملاتړ دی.»
په ورته مهال، افغانستان کې د دې سازمان د بشري مرستو همغږۍ ادارې(اوچا) له ځاني مرګ ژوبلې او مالي زیانونو ترڅنګ، د پراخو ویجاړیو خبر او له خپله اړخه یې د پوره ملاتړ ډاډ ورکړی.
افغانستان کې د ملګرو ملتونو د بشري مرستو همغږۍ ادارې ویلي: « په خیتځ نورستان کې لومړنۍ ارزونې د پراخې ویجاړۍ ښکاروندويي کوي. خلک له منځه تللي، کورونه ویجاړ شوي، سړکونو زیان لیدلی، د ابو سیسټمونه اغېزمن او د ژوند چارې له خنډ سره مخ شوې دي.»
همدارنګه د ملګرو ملتونو د ماشومانو ملاتړ صندوق(یونیسف) هم له سېلاب ځپلو کورنیو سره غمشریکي ښودلې او د پوره مرستې خبره یې کړې.
هاخوا کابل کې د ترکیې او سعودي عربستان سفارتونو پر دغې پېښې خواشیني او له قربانیانو سره یې خواخوږي ښودلې.
د عامې روغتیا وزارت بیا په نورستان کې د ټپیانو روغتیايي وضعیت ته د رسېدنې لپاره بېړنۍ غونډه وربللې او په کې د ټپیانو پر چټکې درمنلې، د زیامنو شویو د روغتیايي اړتیاوو پر ارزونې او د اړینو درملو او تجهیزاتو پر برابرولو ټینګار شوی.
په ورته مهال، ملي دفاع وزارت وايي، د دوی مرسته کوونکي ټیمونه هم په سیمه کې د سېلاب ځپلو د ژغورنې او مرستو په عملیاتو بوخت دي.
د ۲۰۱ خالد بن ولید قول اردو ویاند وحیدالله محمدي وايي: « ختیځ کې د خالد بن ولید قول اردو ځواکونه د نورستان خلکو مرستې ته رسېدلي او عملا ً یې د هغو اجسادو پلټنه پيل کړې چې تر ودانیو لاندې پاتې دي.»
دا داسې مهال ده چې تېره دوشنبه د نورستان مرکز پارون کې د مرګونو سېلابونو له کبله تر دې دمه ۲۶ تنه مړه، څه باندې اتیا تنه ټپیان او تر سلو زیات تری تم دي.
دېته په کتو، په راتلونکو ساعتونو او ورځو کې د له لاسه تللیو کسانو په شمېر کې د پام وړ زیاتوالي احتمال هم لوړی دی.
