ملګرو ملتونو خبرداری ورکړی چې که بشري مرستندویه ادارو ته په بېړني ډول مالي سرچینې برابرې نه شي، نو په افغانستان کې به شاوخوا ۵.۷ میلیونه ماشومان او میندې له اړینو روغتیايي او تغذیوي خدمتونو بې برخې شي.
د دې سازمان د بشري چارو همغږۍ دفتر(اوچا) وايي، د کلونو جګړو، اقتصادي ستونزو او د بشري او پراختیايي فعالیتونو پر وړاندې محدودیتونو له امله، میلیونونه افغانان د نړیوالو مرستو پر دوام متکي دي.
اوچا په خپل راپور کې ویلي چې ماشومان د دې وضعیت تر ټولو زیانمنه برخه جوړوي.
د اوچا راپور کې زیاته شوې: « ماشومان په ځانګړې ډول د دې حالت تر ټولو زیاته زیانمنه برخه جوړوي. د مغذي خواړو، پاکو اوبو، روغتیايي خدمتونو او مناسبې پاکۍ ساتنې کمښت د خوارځواکۍ خطر زیات کړی. په داسې حال کې چې بېوزله کورنۍ اړې کېږي چې د خواړو او نورو اساسي اړتیاوو ترمنځ، سخت انتخاب وکړي.»
ملګري ملتونه دغه راز وايي، د نړیوالو بشري مرستو د بودیجې کمښت په داسې وخت کې رامنځته شوی چې په افغانستان کې د خلکو اړتیاوې لا هم په لوړه کچه کې دي.
د بشري مرستو ادارې خبرداری ورکړی چې د مالي سرچینو نه شتوالی ښايي د خوارځواکو ماشومانو د درملنې، د میندو د تغذیې او نورو اړینو روغتیايي پروګرامونو د کچې او پوښښ د کمېدو لامل شي.
د ملګرو ملتونو په وینا، په لرې پرتو او له خدماتو بې برخې سیمو کې وضعیت لا ډېر د اندېښنې وړ دی.
د اوچا په راپور کې په دې اړه ویل شوي: « د مالي سرچینو نه شتوالی ښايي د خوارځواکو ماشومانو د درملنې، د میندو د تغذیې او نورو اړینو روغتیايي پروګرامونو د کچې او پوښښ د کمېدو لامل شي؛ ځکه هلته روغتیايي او بشري خدمتونو ته لاسرسی له وړاندې هم محدود دی.»
د ملګرو ملتونو د بشري چارو همغږۍ دفتر ټینګار کړی چې د وضعیت لا ډېر خرابېدو د مخنیوي لپاره بشري مرستې حیاتي اهمیت لري.
اوچا دا هم ویلي چې په اوږدمهاله کې د افغانستان د وضعیت د ښه کېدو لپاره د عامه خدمتونو پیاوړتیا، د کاري فرصتونو رامنځته کول او دوامدارې پراختیا ته هم اړتیا ده.
له تېرو دوو کلونو او په تیره بیا د ۲۰۲۶ زېږدیز کال له پیل راهیسې د ملګرو ملتونو بېلابېلې ادارې چې په افغانستان کې په کارونو بوختې دي، بیا بیا د بودیجې د کمښت په اړه شکایت کوي، خو تراوسه د دغې ستونزې د هواري لپاره عملي کار نه دی شوی.
