د ملګرو ملتونو پلاوی او د ننګرهار چارواکي پر زور د پاکستان له لوري راشړل کېدونکو افغانانو ستونزو ته د رسېدنې په موخه سلامشورې کوي.
ملګري ملتونه وايي، که څه هم د نړۍ په نورو هېوادونو کې هم کړکېچونو پراختیا موندلې؛ خو دې سازمان افغانستان له یاده نه دی اېستلی او راستنېدونکو افغان کډوالو سره به په بېلابېلو برخو کې مرستې وکړي.
د افغانستان لپاره د ملګرو ملتونو د ځانګړې استازې مرستيال اندریکا رتواتي وايي:« دا چې اړتیاوې ډېرې زیاتې دي؛ په ځانګړي ډول کله چې را ستانه شوي کډوال خپلو سیمو ته ځي، موږ غواړو دوی سره مرستې وکړو؛ تر څو دوی وکولی شي خپلو سیمو کې مېشت شي او د دوی اوږدمهالو ستونزو ته پاملرنه وشي.»
د ننګرهار چارواکي له ملګرو ملتونو غواړي، چې له پاکستانه په جبري ډول د راستنېدونکو افغان کډوالو د دایمي سرپناه او کار روزګار لپاره زمینه برابره کړي؛ څو یې د بیا ځل لپاره مېنې خالي نه شي.
د ننګرهار مرستیال والي مولوي سعید احمد بنوري وايي:« دوی ( کډوالو) هلته د کار زمېنه برابره شي. همدارنګه د دوی چې هغه کوم ضرورتونه دي، هغه که د تعلیم برخه ده، که د روغتیا برخه ده او که د ژوند په نورو برخو کې ده، ورته رسېدنه وشي.»
په ورته مهال د تورخم ځايي مسوولین شکایت کوي، چې پاکستاني ځواکونه د سياسي عقدو زور له افغان کډوالو او افغان ناروغانو وباسي، چې د مخنیوي لپاره یې له ملګرو ملتونو د همکارۍ غوښتنه کوي.
د تورخم کمېسار مولوي عبدالجبار حکمت وايي:« غوښتنه ترې کوو، چې پاکستان زموږ په هېواد کې مداخله بنده کړي. پاکستان کې چې کوم څه پېښ شي، نو دوی په سرحدونو باندې زور راولي، لارو باندې زور راولي، د موټرو تجارت بندوي، مریضان بندوي، لارې بندوي، د دوی په خپله پاکستان کې ستونزې وي، خو ستونزې زموږ لور ته راوړي.»
په تورخم کې په جبري ډول د راستانه شویو افغان کډوالو د لنډمهالي پنډغالي د مسوولینو د مالوماتو له مخې؛ دا مهال د تورخم په لنډمهالي پنډغالي کې د راستانه شویو کډوالو لپاره شاوخوا ۷۰۰ خېمې لګول شوي او همدا راز د نورو اسانتیاوو ترڅنګ د زرو نورو خېمو د لګولو چمتووالی نیول شوی دی.
