په ملګروملتونو کې د افغانستان اوسنی استازی نصیر احمد فایق وايي، ملګرو ملتونو د مخکېني حکومت د بهرنیو چارو وزیر حنیف اتمر له لوري معرفي شوی استازی رد کړی دی.
فایق وايي،دا یوه توطئه وه او د دغه سازمان د مشرانو له لوري ناکامه شوه.
فایق زیاته کړه:« تاسې ته خبر درکوم،چې د حق، عدالت او د فساد پر ضد د مبارزې پر وړاندې چې کومې توطئې پیل شوې وې او غوښتل کیدل،چې په ملګرو ملتونو کې د افغانستان د دایمي استازولۍ په رهبرۍ کې بدلون راوړي، هغه هڅې خنثی شوې.»
اخوا د سیاسي چارو شنوونکي په دې اند دي،چې اوس مهال د افغانستان هېڅ ډول استازولي د ملګروملتونو لپاره اړینه نه ده،ځکه افغان حکومت د نړیوالو لپاره رسمیت نه لري.
د سیاسي چارو شنونکی طارق فرهادي وايي:« په جینوا او نیویارک کې د ملګرو ملتونو په دفترونو کې د افغانستان سفارتونه داسې دي،چې ملګري ملتونه ورته دې شپو ورځو کې غوږ نه ږدي او نه یې خبره اړینه ګڼي،ځکه پوهیږي،چې هغوی اوس له هېواده جلا شوي دي. اوس یوناما له افغانستان سره اړیکې لري او کله چې حکومت په رسمیت وپیژندل شو،بیا استازولي ګټه لري.»
یو شمېر نور بیا وايي، اوس که اسلامي امارات غواړي، په دغه سازمان کې یې دایمي استازی ومنل شي نو اړینه دا ده،چې هغوی لومړی کورنی مشروعیت او بیا بهرنی رسمیت تر لاسه کړي او څومره چې ژر کیږي دا کار وکړي.
د سیاسي چارو شنونکی زر علي معروف وايي:« تر هرڅه دمخه باید موجوده نظام د دې هڅه وکړي،چې په عاجل ډول کورنی مشروعیت ترلاسه او په تعقیب یې پر نړیواله کچه پر رسمیت وپیژندل شي، ترڅو په ملګرو ملتونو کې د افغانستان د دایمي استازولۍ څوکۍ حکومت ته وسپارل شي.»
په ملګرو ملتونو کې د افغانستان استازولي په یوه درې اړخیزه ستونزه بدله شوې،ځکه ملګري ملتونه د تیر حکومت او اوسني حکومت استازي نه مني او اوس چې هلته کوم استازی دی،هغه هم په رسمیت نه پیژندلو په خاطر جدي نه ګڼل کېږي.
