د ملګرو ملتونو امنیت شورا د خراسان لپاره داعش وسلواله ډله د بندیزونو په لیست کې شامله کړې.
باور کېږي چې په دې سره به د دې ډلې فعالیتونه کمزوري شي.
خو له ملګرو ملتونو غوښتنه کېږي که د دې ډلې له منځه وړل هدف وي نو د دوی په ملاتړو هېوادونو دې فشار راولي.
په عراق او سوریه کې د داعش له ماتې وروسته اوس د دې ډلې زیات تمرکز په افغانستان دی.
اوس چې د داعش فعالیتونه په سیاسي لحاظ زیات شوي ملګرو ملتونو امنیت شورا د افغانستان لپاره د خراسان ډله د بندیزونو په هغه لیست کې ور زیاته کړې چې نړیوالې ترهګریزې شبکې په کې شاملې دي.
امنیت شورا له دې پرېکړې هرکلی کړی او ډاډ یې ښودلی چې داعش به افغانستان کې خوندي ځای پيدا نه کړي.
د اسلامي دولت نومي دا وسلواله ډله په ختیځ کې ډېره فعاله ده چې باور کېږي جنګیالي ورته د افغانستان تر څنګ له پاکستان هم جذبیږي. دې ډلې خپل پټنځای د اوس لپاره کونړ ټاکلی خو د هېواد په سویل لودیځ او شمال کې یې هم فعالیتونه محسوس دي.
د ملګرو ملتونو امنیت شورا پرېکړه له دې امله مهمه بلل کېږي چې په افغانستان کې به یې جګړه کمزورې شي.
له عراق او سورې څخه د داعش وسلوالې ډلې مشر ابوبکر بغدادي احتمالي راتګ پاکستان او افغانستان ته پوښتنې راپورته کړي چې څنګه کېدای شي تر دې ځایه ژوندی را رسېدلی وي.
خو ټینګار په دې کېږي که له دې ډلې سره جګړه یو واقیعت وي نو په ملاتړو هېوادونو دې فشار راوستل شي.
افغانستان کې دا مهال د ۲۱ وسلوالو ډلو خبره کېږي چې له دې القاعده او داعش په تورلیست کې شاملې دي.
