د ملګرو ملتونو امنیت شورا خبر ورکړی چې د جون پر پنځمه یې د بندیزونو کمېټې د ۱۹۸۸ معافیت پرېکړهلیک له مخې، د اسلامي امارت د څلورو مهمو چارواکو لپاره د سفر بنديز د لنډ وخت لپاره، چې د حج ادا کول په کې مطرح شوي معاف کړی دی.
د دغه پرېکړهلیک له مخې، د کورنیو چارو پر سرپرست وزیر سراج الدین حقاني، د ریاست الوزرا پر سیاسي مرستیال مولوي عبدالکبیر، د استخباراتو پر عمومي رئيس عبدالحق وثیق او د ارشاد، حج او اوقافو پر سرپرست وزیر نور محمد ثاقب د حج ادا کولو لپاره د سفر بندیز معاف شوی دی.
ملګري ملتونه وايي: « د ۲۰۲۴ زېږدیز کال د جون پر ۵مه د امنیت شورا د بندیزونو کمېټې د معافیت د ۱۹۸۸ شمېرې پرېکړهلیک له مخې، چې په ۲۰۱۱ کال رامنځته شوی، سراج الدین حقاني، عبدالحق وثیق، عبدالکبیر او نور محمد ثاقب ته د حج ادا کولو په موخه سعودي عربستان ته د سفر بندیز معاف شوی دی.»
د ملګرو ملتونو د معافیت یاد پرېکړهلیک ته د بهرنیو چارو وزارت لا تر اوسه رسمي غبرګون نه دی ښودلی.
له دې سره د سیاسي چارو یو شمېر کارپوهان د ملګرو ملتونو یاده پرېکړه ستايي او له نړیوالې ټولنې غواړي، چې له سرپرست حکومت سره د سیاسي تعامل لپاره مخامخ خبرو او د بندیزو معافیت ته لومړیتوب ورکړي.
د سیاسي چارو کارپوه محمد زلمی افغانیار وايي: « ټولو سیاسي ستونزو ته د خبرواترو له لارې د حللار پیدا کېږي، دا چې د سرپرست حکومت د څلورو چارواکو نومونه په لنډمهاله توګه د بندیزونو له لېسته وتلي؛ یو مثبت ګام دی، هیله من یو چې داسې تعاملات ترسره شي چې له مخې یې افغانستان خپل سیاسي او اقتصادي ثبات ترلاسه کړي او د سیاسي او اقتصادي ګټو لپاره لارې چارې پیدا شي.»
د سیاسي چارو کارپوه نجیب الرحمان شمال وايي: « هیله من یو چې دا تعاملات او اړیکې پراخه شي او د اوسني سرپرست حکومت چارواکي د نړیوالې ټولنې او په ځانګړې توګه افغانستان د خلکو مشروع غوښتنو ومني، د لا زیاتو تعاملاتو او اړیکو د پراختیا لپاره لار هواره او د نړیوالې ټولنې لازیات باور ترلاسه کړي.»
دا په داسې حال کې ده، چې د کورنیو چارو وزارت سرپرست وزیر سراج الدین حقاني تېره سهشنبه د غبرګولي پر ۱۵مه د یوه پلاوي پر مشرۍ چې د سرپرست حکومت د استخباراتو عمومي رئیس عبدالحق وثیق یې هم ملتیا کوله، په خپل لومړني بهرني سفر کې متحده عربي اماراتو ته ولاړ.
