<h2>د هېواد د پخواني ولسمشر حامد کرزي لخوا په یو لیک کې چې د ملګرو ملتونو د عمومي منشي په نامه یی لیکلی دی، له ملګرو ملتونو په کې غوښتنه شوې چې پر افغانستان د پاکستان د پوځي رژیم بریدونه، چې د سلګونو بې ګناه ملکي وګړو د مرګ ژوبلې او عامه تاسیساتو ته د درنو زیانونو سبب ګرځیدلی وغندي.</h2><br> <h2>کرزي په دې لیک کې د ملګرو ملتونو له عمومي منشي انټونیو ګوتېرېش دا غوښتنه هم شوې چې له ټولو امکاناتو په ګټې د پاکستان د پوځي رژیم له لوري د افغانستان د ملي حاکمیت او ځمکنۍ بشپړتیا د نقض مخنیوی وکړي.</h2><br> <h2>کرزي په دې لیک کې ویلي دي چې پاکستان لږ تر لږه له څلورو لسیزو راهیسې د مغرضانه پالیسو په کارولو سره له افراطیت په سیمه کې د نفوذ د یوې وسیلې په توګه کار اخیستی دی.</h2><br> <h2><strong>د لیک یوه برخه: « په تیرو څلورو لسیزو کې پاکستان د مغرضانه پالیسۍ له مخې له افراطیت په سیمه کې د نفوذ د یوې وسیلې په توګه کار اخیستی دی، نو د ملګرو ملتونو له عمومي منشي زموږ غوښتنه دا ده چې له ټولو ممکنه هڅو څخه په استفادې د پاکستان د پوځي رژیم له لوري د افغانستان د ملي حاکمیت او ځمکنۍ بشپړتیا د نقض او د بریدونو مخنیوی وکړي او د تاوتریخوالي په کمولو سره سیمه له موجوده کړکیچ خلاصه کړي.» </strong></h2><strong><br></strong> <h2>د پخواني ولسمشر حامد کرزي لخوا دا غوښتنه داسې مهال شوې چې په افغانستان کې د ملګرو ملتونو د بشري مرستو د همغږۍ ادارې (اوچا) په خپل یوه راپور کې ویلي دي چې د تیرې فېبرورۍ میاشتې راهیسې د ډیورنډ په فرضي کرښه د نښتو، بمباریو او نورو درنو وسلو د ډزو له کبله په سلګونه ملکي وګړي چې ښځې او ماشومان په کې شامل دي مړه او ژوبل شوي دي.</h2><br> <h2>اوچا وړاندې په خپل راپور کې لیکلي دي، چې د پاکستان د پوځي رژیم د بریدونو له کبله د افغانستان په ختیځ او جنوب ختیځو سیمو کې شاوخوا ۹۴ زره کسان بې ځایه شوي دي.</h2><br> <h2>د اوچا د راپور له مخې، د پاکستان د بریدونو له کبله د نورو عامه تاسیساتو ترڅنګ ۲۵ روغتیايي مرکزونه او ۴۱ ښوونځي زیانمن شوي او تړل شوي دي.</h2><br> <h2><strong> د راپور یوه برخه:« د درنو وسلو په ډزو، هوايي بریدونو او نښتو کې د ښځو او ماشومانو په ګډون ملکي وګړي مړه او ژوبل شوي دي، په دوی کې یو بشري کارکوونکې هم شامل دی. له دې سربېره ۹۴ زره کسان چې۱۳ زره او ۴۰۰ کورنۍ دي، په خوست، کونړ، ننګرهار، پکتیا، پکتیکا او نورستان ولایتونو کې بې ځایه شوي دي. همداراز ۳۵ روغتیايي مرکزونه او ۴۱ ښوونځي زیانمن شوي او تړل شوي دي، چې له دې سره روغتیایي خدمات او د زده کړو بهیر زیانمن شوی دی.» </strong></h2><strong><br></strong> <h2>د پاکستان د پوځي رژیم د بریدونو له امله د اوښتو زیانونو په اړه د اوچا لخوا دا راپور داسې مهال خپور شوی، چې د ملګرو ملتونو کارپوهانو پر افغانستان د پاکستان د پوځي رژیم له لوري کېدونکي بریدونه د ملګرو ملتونو له منشور او نړیوالو بشري قوانینو سره په ټکر کې بللې دي.</h2><br> <h2>دغو کارپوهانو په روانو شخړو کې د ملکي وګړو د مرګ ژوبلې د هرې پیښې په اړه د ناپیلو، دقیقو څېړنو غوښتنه کړې ده، څو د داسې بریدونو عاملان محاسبې ته وړاندې او د قربانیانو کورنیو ته د غرامت ورکولو زمینه برابره شي.</h2><br> <h2>نه یوازې پخوانی ولسمشر بلکه په هېواد کې دننه او بهر مېشتو افغانانو د لاریونونو په ترسره کولو سره د پاکستان د پوځي رژیم لخوا کېدونکي بریدونه غندلي او د ملګرو ملتونو په ګډون یې له نړیوالو سازمانونو د پاکستان د پوځي رژيم د محاسبې لپاره د سختو اقداماتو غوښتنه کړی ده.</h2><br> <h2>په داسې حال کې، چې افغانان له ملګرو ملتونو په دې اړه د تحقیقاتو غوښتنه کوي، خو ملګري ملتونه بیا وايي، په دې اړه تحقیقات باید د زیانمن شوي هېواد له لوري ترسره شي او ملګري ملتونه یوازې د دغو تحقیقاتو د شفافیت لپاره پر هغو څارنه کوي.</h2> <h2>شریک یې کړئ </h2>
