هرات ښار کې پرون د افغان حکومت او طالبانو ترمنځ نښته کې د یوناما پر دفتر هم ډزې شوي،چې له امله یې د دوی د دفتر یو پولیس وژل شوی او یو شمېر نور پولیس ټپیان شوي، خو د ملګرو ملتونو کار کوونکو ته زیان نه دی اوښتی.
افغانستان کې د ملګرو ملتونو سازمان غړو ویلي، وسله والو د دوی پر دفتر قصدي برید کړی،ځکه پر وینا یې لومړی د یوناما پر ودانۍ ډزې شوي، بیا لاسي بم ورغورځول شوی دی .
بل پلو سپینې ماڼۍ هم دغه برید غندلی او ویلي یې دي،چې یوناما افغانستان کې یو غیر پوځي بنسټ دی،چې پر سولې او د ټولو افغانانو د حقونو خوندیتوب برخه کې کار کوي .
