افغانستان کې د جګړې په دواړو لورو مرستې بندې شوي نو ځکه یې سولې ته مخه کړې.
د ملي امنیت شورا پخواني سلاکار ډاکټر سپنتا په یوې غونډې کې ټینګار کړی چې د طالبانو هغه شرط باندې دې بحث وشي چې د بهرنیو ځواکونو د حضور په تړاو یې لري.
له دې سره د کورنیو چارو مخکینی وزیر وایي، جګړې فقر او بې کاري زیاته کړې او سوله د جګړې په زور نه راځي.
بلخوا د احمد شاه مسعود بنسټ مشر انديښنه ښودلې چې طالبان په اوسني حکومت باور نه لري، نو ځکه له امریکا سره په خبرو ټینګار لري.
سوله د ملي وفاق په هنداره کې د غونډې تر شعار لاندې پخواني چارواکي راټول شوي چې تر ډيره یې بحث پر سوله او اوسني حکومت نیمګړتیاوو باندې دی.
د ملي امنیت شورا پخوانی سلاکار ډاکتر رنګین دادفر سپنتا باور لري چې هغه سوله پایداره ده، کومه چې د افغانانو په مشرۍ او مالکیت ترسره شي.
رنګین دادفر سپنتا ټینګار کړی چې که سوله د بهرنیو ځواکونو د حضور په پای راځي، اړتیا ده چې بحث ورباندې وشي.
د ملي امنیت پخوانی سلاکار ډاکتر رنګین دادفر سپنتا داسې وویل (( که د طالبانو دا شرط وي چې امریکا دې خپل حضور په افغانستان کې ختم کړي، نو باید په دې برخه کې بحث وشي .))
له دې سره یو ځای د کورنیو چارو مخکیني وزیر عمر داودزي نیوکه کړې چې اوسنی حکومت د اکثریت خلکو نماینده ګي نه کوي، ځکه فقر او بې کاري پکې اوج ته رسیدلې ده.
د کورنیو چارو پخواني وزیر عمر داوودزي داسې ویلي (( په فعلي وضعیت کې موږ له دوو مشکلاتو سره مخ یو نا امني او فقر او بې کاري سرمایی فرار ته زمینه مساعده کړې او همدا راز مرستې هم کمې شوي دي ))
د احمدشاه مسعود بنسټ مشر چې د دې غونډې کوربه دی، د اوسني حکومت په جوړښت کې باور نه لري چې سولې ته دې ورسیږي.
ولي مسعود وایي، حکومت د سیاسي قدرت لپاره سوله کړې وه او په پاتې څلور میاشتو کې نه شي توانیدلی چې افغانان سولې ته ورسوي.
د احمدشاه مسعود بنسټ مشر احمد ولي مسعود داسې وویل (( طالب هم اوس په دې حکومت باور نلري ځکه له دوی سره د سولې مذاکرات نهکوي له امریکا سره یې کوي ))
د ملي امنیت شورا پخواني سلاکار ټینګار کړی، چې په یو ځای جګړه او سوله نه کېږي، وایي، سوله هغه وخت راتلونکې ده چې قوي اراده رامنځ ته شي او د جګړې لاملونه تر بحث لاندې ونیول شي.
دا غونډه په داسې حال کې جوړه شوې، چې مسکو کې طالبان او د سولې شورا غړي د بهرنیو استازو په حضور کې د روسیې په کوربتوب یوې ناسته کې ګډون کوي چې د جمعې په ورځ به پيل شي.
