د ملي دفاع وزارت مرستیال ویاند فواد امان وايي، پاڅون کوونکو چې په خپلو سېمو کې د وسله والو طالبانو پر ضد جګړې ته تیاری نیولی،د سیمو په ساتلو، بېرته نېولو او د وسله والو ډلو د فعالیتونو په دفع کولو کې مهم دي.
امان زیاته کړه:« ولسي پاڅونوال له موږ سره په همغږۍ د افغان ځواکونو ترڅنګ د طالبانو پر وړاندې مبارزه کوي. د دوی ملاتړ بې شکه چې د طالبانو په ځپلو او دغه راز د یو شمېر سېمو په بېرته نیولو کې مهم دی. »
افغان حکومت له وړاندې ویلي، پاڅونوالو ته یې وسلې او اکمالات نه دي ورکړي او نه د ملیشه جوړونې هوډ لري.
د زرګونه پاڅونوالو په تړاو دا اندېښنې هم شته،چې د هېواد راتلونکي امنیت ته به په لوی ګواښ بدل شي،خو امنیت شورا بیا وایي، ښايي پاڅون کوونکي د سیمه ییزې اردو لیکو ته جذب کړي او فعالیت به یې قانوني وي.
بل پلو یو شمېر پخواني پوځیان هم په اوس کې ولسي پاڅونونه ګټور بولي،خو د پاڅونکوونکو پر کنټرول ټینګار کوي.
پخوانی پوځي جنرال ثمر سادات وايي: « ولسي پاڅونوال باید د ملي دفاع او کورنیو چارو وزارتونو او ملي امنیت په چوکات کې تنظیم شي. د دوی له لوري باید سوق او اداره شي. دا افغانستان کې د ثبات او امنیت ټېنګښت له پاره مهم دي. »
وروسته له هغې چې وسله والو طالبانو د هېواد په بېلابېلو ولایتونو کې جګړو ته زور ورکړ، بادغیس، سرپل، بلخ، بدخشان، تخار، کندز، پروان، خوست، کندهار، زابل، ارزګان، ننګرهار، لغمان، کاپیسا او کابل ولایتونو کې زرګونه ولسي پاڅونوالو د افغان ځواکونو پر ملاتړ او د وسله والو طالبانو پر ضد وسله پورته کړه.
د معلوماتو له مخې، تر ټولو زیات پاڅونوال په ننګرهار او لغمان کې دي،چې شمېر یې څلور زره ښودل شوی او دوه زره په بلخ ولایت کې دي.
