د ملي دفاع وزارت ویاند روح الله احمدزی وايي، دغه دوه ولسوالۍ په بغلان او پروان ولایتونو کې بېرته له طالبانو نېول شوي دي.
احمدزی وایي، د نښتو پر مهال وسله والو طالبانو ته درانه تلفات هم اوښتي دي.
احمدزي زیاته کړه:« په تېرو ۲۴ ساعتونو کې زموږ ځواکونو په بغلان او پروان ولایتونو کې دوه ولسوالۍ بېرته له وسله والو طالبانو نیولي. دا مهال په ګڼو سیمو کې عملیات دوام لري او همدا راز د افغان هوايي او ځمکنیو ځواکونو په بریدونو کې دښمن ته درانه تلفات اوښتي دي.»
وسله والو طالبانو هم ادعا کړې، چې د وروستیو نښتو پرمهال یې دوه ولسوالۍ او یو شمېر پوستې سقوط کړې دي.
د طالبانو ویاند ذبیح الله مجاهد وايي:« په تېرو ۲۴ ساعتونو کي دوه ولسوالۍ نیول شوي دي او ترڅنګ يې ۶۲ میله وسلې او ۸ قرارګاوي نیولي دي. کلدار ولسوالۍ په بلخ ولایت او خان چهار باغ ولسوالۍ په فاریاب کې نیول شوي، د غزني ګیلان ولسوالۍ هم نیول شوې ده.»
په همدې حال کې د ولسي جرګې غړو روانه جګړه کې د ملکي وګړو په مرګ ژوبلې اندېښنه ښودلې او نیوکه یې کړې، که وضعیت په همدې شکل دوام وکړي، جګړه به د ښارونو ترمنځ وغځېږي.
د ولسي جرګې غړی شاخان شېرزاد وايي:« که وضیعت همدا ډول دوام وکړي او د افغان ځواکونو ترمنځ همغږي رامنځته نه شي، ناممکنه نه ده، چې ولایتونه دې هم سقوط وکړي، خو امکان شته چې نوې رهبري وکولائ شي، روانه جګړه کنټرول کړي. روان وضیعت د ملکي خلګو ژوند له ګواښ سره مخ کړی دی.»
ملي دفاع وزارت دغه راز زیاتوي، چې د افغان ځواکونو په متقابلو بریدونو کې په کندهار٬ غزني او هلمند ولایتونو کي وسله والو طالبانو ته درنه مرګ ژوبله اوښتې او دا مهال افغان ځواکونه په نږدې ۱۵ ولایتونو کې جګړه کې برلاسي دي.
