له پاکستاني ځواکونو سره پر ډیورنډ فرضي کرښه او ایران او ترکمنستان سره د سرحدونو پر سر د افغان او یادو هېوادونو د پوله ساتو ځواکونو ترمنځ له شخړو وروسته د افغانستان ملي دفاع وزارت وايي، له ګاونډيانو سره ښيې اړیکې غواړي،خو د پولو او تمامي ارضیت په اړه بې تفاوته نه شي پاتې کېدای.
د یاد وزارت خبرداری ورکړی،چې هېڅ ګاونډي هېواد ته به د افغان خاورې لاندې کولو او تیري اجازه ورنه کړي.
د ملي دفاع وزارت ویاند عنایت الله خوارزمي وايي:«د اسلامي امارت او د ملي دفاع وزارت رهبري نه یوازې د سرحدونو بلکې د خلکو او خاورې په اړه هېڅکله بې تفاوته نه دي او نه به بې تفاوته پاتې شي. هر څوک او هېواد چې د تیري نیت ولري لاسوهنه وکړي لاسونه به یې لنډ شي.»
اخوا د بهرنیو چارو وزارت خبرپاڼه کې ترکمنستان سره د پولې پرسر شخړه رد شوې،هغه څه چې ترکمنستان هم ویلي، چې افغانستان سره ښې اړیکې لري او د خپلو پوله ساتو ځواکونو او طالبانو ترمنځ شخړه یې رد کړې ده.
خو بهرنیو چارو وزارت وایي، پاکستان سره پر ډیورنډ فرضي کرښه شخړه له ډیپلوماټیکو لارو حل کوي.
د بهرنیو چارو وزارت د خبرپاڼې یوه برخه:« په دې وروستیو کې د افغانستان او پاکستان ترمنځ د ډیورنډ کرښې په ځینو برخو کې داسې پېښې شوي دي،چې اړتیا یې راټوکولې، تر څو د دواړو هېوادونو مسوولین د ستونزو هواري په اړه خبرې وکړي. د افغانستان اسلامي امارت چې د تفاهم او د خبرو اترو له لارې د ستونزو پر هواري او ښه ګاونډیتوب باور لري، پاکستاني لوري سره به د ديپلوماتيکو چينلونو له لارې په دې اړه خبرې اتري وکړي.»
په همدې حال کې د سیاسي یو شمېر کارپوهان بیا وایي،افغانستان له یو حساس پړاو تېرېدونکی دی او ښه ده،چې ګاونډیانو سره شخړې او جګړې د خبرو اترو له لارې هوارې شي.
د سیاسي چارو کارپوه سرور نیازی وايي:« د پاکستان او افغانستان ترمنځ له پخوا د کرښې پرسر ستونزې موجودې وې،کله کله ایران هم خپل ځواکونه د افغانستان خاورې ته رانږدې کړي دي او ستونزې یې جوړې کړي دي. د پولو مسله حساسه ده او افغانستان هم په حساس پړاو کې ده،ښه ده چې دا مسایل په سیاسي لارو حل شي.»
په خواله رسنیو کې داسې ویډوګانې او راپورونه لاس په لاس کېږي،چې ښي ایران، پاکستان او ترکمنستان پوله ساتي ځواکونه له خپلې جغرافې د افغانستان خاورې ته رااوړي،چې افغان پوله ساتو ځواکونو یې د مخنیوي لپاره د خپل هېواد دفاع کړې ده او تیري ته یې توند غبرګون ښودلی دی.
