په هېواد کې د ملکي وګړو ژوبله د هرې ورځې په تېرېدو سره ډيره شوې او تل ښکېل لوري يې پړه پر يو او بل اچوي.
نن د ملکي وګړو د مرګ ژوبلې د مخنيوي په تړاو يو اپلیکشن چې په ځيرکو ټليفونونو کې د کارونې وړ دی، رسما پرانيستل شو.
د پرانیستې مراسمو کې د افغانستان د ملي امنیت شورا چارواکو وویل چې طالبان تل ملکي وګړي د خپلو موخو لپاره سپر کوي او د ډېرې مرګ ژوبلې لامل دوی دي.
دوی وايي چې حکومت د ملکي مرګ ژوبلې مخنيوي ته ژمن دی او د دې کار لپاره يي ۲۰۰۰ هوايي عملیات لغوه کړي دي.
ملي امنیت شورا وایي: ((حکومت د ملکي وګړو له مرګ ژوبلې د مخنيوي لپاره په تېر کال کې دوه زره هوایې عملیات لغوه کړي٬ خو وسله والو له دې وضعيت څخه غلطه ګټه پورته کړې، حکومت له ملکي وګړو ساتنې ته ژمن دی او دفاع وزارت ته مو جدي لار ښونه کړې چې د ملکي وګړو د تلف کېدو مخه ونيسي.))
خو د اروپايي ټولنې سفير په دې ناسته کې د ملکي وګړو له تلف کيدو د مخنيوي يوازنۍ لار دايمي اور بند بولي.
افغانستان کې د اروپايي ټولنې سفیر اندریس وون برنډ وویل: (( اروپايي ټولنه په افغانستان کې تل پاتې اور بند غواړي. نړیوال قوانين هم دا وايي چې د جګړې مخنیوی دې وشي، موږ تل په بشري برخه کې خپل غږ پورته کړی او هغو سیمو ته ځانونه رسوو چې تر حکومتي حاکميته بهر دي.))
د طالبانو يو پخوانی غړی او د خلاصون په نوم د شورا مشر سید اکبرآغا بیا وايي چې ښکيلو لورو ملت ته مراجعه نه ده کړې او له همدې امله تل د ملکي وګړو مرګ ژوبله ډيره وي.
جینوا غږ اپلیکشن د اروپايي ټولنې سویډن او اسټرالیا په مالي مرسته جوړ شوی او خلک کړای شي له انټرنيټ پرته د ملکي وګړو د مرګ ژوبلې په تړاو معلومات تر لاسه او وګوري.
