د ایران بهرنیو چار وزیر سید عباس عراقچي پر مشرۍ لوړپوړی پلاوی د یکشنبې پر ورځ د(۱۴۰۳ کال د سلواغې پر ۷ مه) په رسمي سفر کابل ته راغلی.
عراقچي په دې سفر کې د اسلامي امارت له رئیسالوزرا او د بهرنیو چارو وزارت له سرپرست سره د لیدنې پرمهال په افغانستان کې امنیت او ثبات د ایران له امنیت او ټیکاو سره تړلې مساله بللې او له سرپرست حکومت سره یې د اړیکو د پراختیا ډاډ ورکړی.
د ارګ له خوا خپره شوې اعلامیه کې راغلي، د ایران بهرنیو چارو وزیر د تفاهم له لارې د کډوالو او اوبو اړوند مسایلو پر حل د ټینګار ترڅنګ، د افغانستان په کورني سیاست کې د مداخلې نه کولو ډاډ ورکړی.
د اسلامي امارت مرستیال ویاند حمدالله فطرت وايي: «ښاغلي عراقچي وويل، د ايران امنيت او ثبات د افغانستان په امنيت او ثبات پورې تړلی دی او په افغانستان کې وروستيو پرمختګونو دې نتيجې ته رسولي يوو چې له اسلامي امارت سره بايد همکاري نوره هم پراخه شي. د ايران د بهرنيو چارو وزير په ياد هېواد کې د افغان کډوالو ستونزو ته د رسيدګۍ او د اوبو موضوع ته په اشارې وويل، دواړه موضوعات بايد د همکاريو د پراختيا لامل شي او ايران په ابرومندانه ډول د غير قانوني افغان کډوالو ستنولو ته ژمن دی. نوموړي وويل، ايران هېڅکله د افغانستان په داخلي سیاست کې د مداخلې نيت نه لري.»
بل پلو، په دې ناسته کې د سرپرست حکومت رییس الوزرا ملا محمد حسن اخوند ایراني لوري ته ډاډ ورکړی چې افغانستان د اوبو په مساله کې یاد هېواد ته د زیان رسولو هوډ نه لري او ورسره د ښه نیت له مخې تعامل کوي.
ملاحسن اخوند د ایران له لوري له افغان کډوالو سره د اسلامي او ګاونډيتوب له اصولو سره سم د ښه چلن او له دې هېواد د افغان کډوالو په تدریجي ډول د ایستلو غوښتنه کړې.
د اسلامي امارت مرستیال ویاند په دې اړه وايي: « محترم ریيس الوزرا وويل، د اوبو په موضوع کې افغانستان هېڅکله ايران ته د ضرر رسولو هوډ نه لري او په دې برخه کې د ښه نيت پر اساس تعامل کوي. محترم الحاج ملا حسن اخوند د ايران له لوري له افغان کډوالو سره د اسلامي او ورورګلوۍ اصولو پر اساس د چلن غوښتنه وکړه او وې وويل، د تاريخ په اوږدو کې په لويه پيمانه د اقتصادي مسايلو له مخې له افغانستان څخه ايران ته د ورغلو افغان کډوالو د اخراج مديريت په لنډه موده کې امکان پذيره نه دی او په دې برخه کې يې له ايران د تدريجي اقداماتو غوښتنه وکړه.»
د بهرنیو چارو وزارت مرستیال ویاند ضیااحمد تکل وايي: « په دې ناسته کې دواړو لورو د افغانستان او ایران ترمنځ پر دوه اړخیزو اړیکو، اقتصادي همکاریو، په ایران کې د افغان مهاجرینو پر وضعیت، پر ګډو پولو او د اوبو پر مسایلو خبرې اترې وکړې.»
د سیاسي چارو شنونکي د بهرنیو چارو وزیر پر کچه د ایران لوړپوړي چارواکي راتلل، د ډېپلوماټیکو اړیکو د لاپیاوړتیا په موخه د اسلامي امارت لپاره مثبت ګام بولي.
دوی په اوسنیو شرایطو کې چې سرپرست حکومت له نړۍ او په ځانګړي ډول له ګاونډیو هېوادونو سره د اړیکو پر جوړولو بوخت دی او ورسره په سیمه کې د ایران نفوذ کمېدو ته په کتو، د سیاسي، اقتصادي او سوداګریزو اړیکو پیاوړتیا دواړه لورو ته مرسته رسولی شي.
د نړیوالو اړیکو کارپوه مرتضی مطهري وايي: « افغانستان ته د ایران اسلامي جمهوریت د بهرنیو چاروز وزیر سید عباس عراقچي سفر د اسلامي امارت لپاره یو ډېر مثبت ګام دی، ترڅو د کابل او تهران ترمنځ د لا ډېرو ډېپلوماټیکو اړیکو لپاره زمینه برابره شي.»
د پوهنتون استاد فیضمحمد ځلاند وايي: « د یوه مسلمان ګاونډي هېواد په توګه له ایران سره د افغانستان اړیکې ډېرې له ارزښت ډکې دي. د ایران، پاکستان او نورو ګاونډیانو سره مخامخ اړیکې نه بدلېدونکې دي.»
افغانستان ته د ایران د بهرنیو چارو وزیر سید عباس عراقچي سفر داسې مهال دی چې شاوخوا یوه اوونۍ وړاندې د سترې محکمې مرستیال عبدالمالک حقاني پر مشرۍ لوړ پوړی پلاوی ایران ته تللی و.
نوموړي په دې سفر کې له ګڼو ایراني چارواکو سره په جلا لیدنو کې د دواړه هېوادونو ترمنځ په قضایي برخو کې د همکاریو ټینګښت او غوره تعامل، په ایران کې د افغان زندانیانو د حقونو تامین، په دې هېواد کې پر اعدام د محکومو افغانانو د اعدامولو پر ځای بدیلې لارې لټول او د زندانیانو د استرداد په څېر پر مهمو موضوعاتو خبرې اترې شوې وې.
له دې سفر وروسته سترې محکمې له ایران څخه افغانستان ته د ۱۵۰۰ افغان بندیانو د راستنولو خبر هم ورکړ.
