Skip to content
د افغانستان اسلامي امارت د رئیس الوزرا لومړي مرستیال ملا عبدالغني برادر د چهار شنبې پر ورځ د « ۱۴۰۰ د کب پر ۱۸ م» د افغانستان لپاره د اسلامي همکاریو سازمان له ځانګړي استازي طارق علي بخیت سره کتلي دي.
دواړو په افغانستان کې پر بشري مرستو، د ښځو پر تعلیم، امنیت، د فساد پر وړاندې د مبارزې او د زیربنايي پروژو پر پيل کولو خبرې کړي دي.
بخیت ویلي، نړیوالو اوس دا درک کړې،چې په افغانستان کې د فساد پر وړاندې جدي ګامونه اخېستل شوي او وضعیت ورځ تر بلې پر ښه لوري روان دی.
بخیت همدا راز ډاډ ورکړی دی، چې د اسلامي همکاریو سازمان افغانستان ته د یوه مهم غړي هېواد په توګه ګوري او افغانانو سره د مرستو په موخه صندوق جوړوي،چې په نږدې راتلونکي کې به یې پرانېسته هم وکړي.
د یاد سازمان استازي د شهیدانو او معلولینو چارو او د بهرنیو چارو سرپرست وزیرانو سره هم کتلي او په بېلابېلو برخو کې یې د مرستو او همکاریو ډاډ ورکړی دی.
