د ریاست الوزرا اقتصادي مرستیال د نورستان ولایت په مرکز پارون کې د وروستیو سېلابونو د قربانیانو کورنیو ته ډاډ ورکړ چې حکومت په دې سختو شېبو کې د دوی ترڅنګ ولاړ دی او ملاتړ یې کوي.
برادر په سېلابونو کې زیانمنې شوې کورنۍ مخاطبې کړې او وویل چې نورستان د افغانستان خاوره او اوسېدونکي یې د دې خاورې بچیان دي.
د ملا برادر په خبره، له سېلابونو وروسته د هېواد له ګوټ ګوټ څخه چارواکي او خلک نورستان ته ورغلل، ترڅو له زیانمن شویو خلکو سره خپل یووالی وښيي.
برادر د نورستان له خلکو هم وغوښتل چې له اسلامي امارت څخه د ملاتړ لپاره باید یو موټي او متحد و اوسي.
د ریاست الوزرا اقتصادي مرستیال زیاته کړې: « دا ځای د افغانستان یوه خاوره ده او تاسو د دې خاورې بچیان یاست. ټول افغانستان یو کور دی او جدايي یې ترمنځ نه شته. زه تاسو اطمینان درکوم هغه ستونزې چې محترم معاون صاحب بیان کړې، موږ به یې په تدریج سره ټولې هوارې کړو. دا کوم شی چې تاسو ته د الله له جانب څخه رسېدلی، انشاالله تر هغه نه کمېږي بلکې زیاتېږي به. د انسانانو بدله څوک نه شي ورکولی، خو د مالي زیانونو به بدله ورکړو. تاسو به هم د نظام داسې ملاتړ کوی لکه څرنګه چې د افغانستان له هر کونج څخه خلکو ستاسو ملاتړ وکړ. موږ ټول باید یو ذهن او یو فکر ولرو.»
د ریاست الوزرا له اقتصادي مرستیال سره د سوداګرۍ او پانګونې خونې مشرتابه پلاوي هم ملګرتیا کوله. دوی په نورستان کې د سېلابونو له کبله له زیانمنو شویو کورنیو سره اووه میلیونه افغانۍ نغدي مرسته د نورستان مرستیال والي ته وسپاره.
د نورستان په مرکز پارون کې د وروستیو سېلابونو له امله چې شاوخوا دوې اوونۍ مخکې پېښ شول، د سر او مال درانه زیانونه واوښتل.
په دغو سېلابونو کې د نورو کسانو ترڅنګ، د پارون ښاروال او په پارون کې د یوه کنډک د قومندان په ګډون، یو شمېر دولتي مسوولینو هم خپل ژوند له لاسه ورکړ.
بله خوا، د نورستان مرستیال والي د ریاست والوزرا اقتصادي مرستیال او ملګري پلاوي ته یې د سېلابونو پر مهال د اوښتو زیانونو معلومات وړاندې کړل.
ده په خپلو خبرو کې ښاغلي برادر ته ډاډ ورکړ چې د نورستان په وروستیو سېلابونو کې زیانمنو شویو کورنیو سره مرستې به په پوره رڼتیا ووېشلې شي.
د نورستان مرستیال والي مولوي فیصل مختار وايي: « زه دا اطمینان ورکوم چې مرستې به مستحقو کسانو ته رسېږي، موږ به دېته ادارې ترتیب جوړ کړو.»
نورستان د افغانستان یو له غرنیو ولایتونو څخه دی چې د اراضۍ ډېره برخه یې په غرونو او ځنګلونو پوښلې ده او ډېره لږه هواره ځمکه لري.
دا سېلابونه داسې مهال راوتلي وو چې په هغو ورځو کې پارون او شاوخوا سیمې له سیلانیانو څخه ډکې وې، خو له شته اندېښنو سربېره، دوی ته زیات زیان نه دی اوښتی.
