کورنيو چارو وزارت د کومې ډلې له نوم اخستو پرته وايي، د افغانستان ضد عناصر له ډيورنډ فرضي کرښې پورې غاړه خوندي مرکزونه لري او د پاکستان پوځ يې پر روزلو او ملاتړ بوخت دی.
د دې وزارت چارواکي زياتوي، حکومت د متقابل احترام د اصل پر بنسټ له هېوادونو سره د ښو اړيکو غوښتونکی دی او ټينګار کوي چې د افغانستان ضد ډلو ملاتړ د پاکستان په ګټه نه دی.
د کورنيو چارو وزارت د داخلي امنيت ریيس سلطان محمد مفکر وايي: « د پاکستان موقف تل داسې پاتې شوي چې د افغانستان د نظامونو مخالفین یې تل په خپله خاوره کې ساتلي دي. دوی په نظریاتو کار نه کوي بلکې په افغانستان کې د برحال نظام مخالفین ساتي. موږ د هېڅ ګاونډي هېواد په ضرر نه یو او نه به پاتې شو.»
نوموړی د وسلهوالو ډلو له لوري د افغانستان خاورې کارېدو په اړه د پاکستان مکررې اداعاوې ردوي او زياتوي چې د دې هېواد له لوري ورته ادعاې د پاکستان امنيتي کمزورتیا له امله دي.
هغه د پاکستان د دې ادعا له مخې د پوښتنې په توګه وايي، که ریښتيا هم په افغانستان کې وسلهوالې ډلې حضور لري، نو ولې نورو ګاونډيو او په ځانګړې توګه چين او ايران ته خطر نه پېښوي؟
د کورنيو چارو وزارت د داخلي امنيت رییس زیاتوي: « که دوی وايي چې له دې خط څخه مخالفین ها خوا[پاکستان] ته اړوي، نو موږ خو له پاکستان پرته پنځه نور ګاونډیان هم لرو؛ ولې چین، تاجیکستان، ازبېکستان، ترکمنستان او ایران ته مخالفین نه ورځي؟ که موږ د دوی ادعا مطالعه کړو، له دوو حالتونو خالي نه ده؛ یا دروغ وايي؛ ځکه دوی خپله هلته کار کوي.»
څو ورځې وړاندې د حکومت وياند له ايراني رسنیو سره خبرو کې وویل، په اسلاماباد کې پر يوه جومات شوې خونړۍ چاودنه له ترهګرۍ د پاکستان د ملاتړ محصول دی.
د چارو شنونکي بیا پاکستان له جوړېدو راهیسې تر دې دمه تل د افغانستان پر وړاندې په دوه مخي سیاست تورنوي او وايي، هېڅکله يې په افغانستان کې د يوه پياوړي حکومت له رامنځته کېدو سره همکاري نه ده کړې.
د سياسي چارو شنونکی توريالی ځاځی وايي: « موږ ولیدل چې پاکستان په تېره نیمه پېړۍ کې څومره جنایتونه ترسره کړل. پاکستان ته په افغانستان کې د یوه پياوړي نظام او امنیت شتون په هېڅ صورت د منلو نه دي.»
د نړيوالو اړيکو شنونکی نجيب الرحمان شمال وايي: « پاکستان هېڅکله نه غواړي چې افغانستان کې یو قوي او مقتدر حکومت جوړ شي.»
واک ته د اسلامي امارت له بيا رسېدو راهيسې پاکستاني چارواکو او ان لومړي وزير په وار وار د اسنادو له وړاندې کولو پرته په افغانستان کې د پاکستان ضد ډلو د موجوديت ادعا کړې، خو اسلامي امارت تل دا ډول ادعاوې بې اساسه بللې او برعکس يې د اسنادو په وړاندې کولو سره روښانه کړې چې پاکستان تر خپل کنټرول لاندې خيبرپښتونخوا او بلوچستان کې د افغانستان ضد ډلې ساتلې دي.
