مشرانو جرګې د رایو په اکثریت سره د ۱۳۹۹ کال بودیجه تائید کړه.
سناتورانو د سه شنبې ورځې بحث کې بودجه باندې بحث وکړ او ځینو نیوکه کوله چې ۹۹ کال بودیجه کې انډول په پام کې نه دی نیول شوی او نه هم هغه پروژې پلې شوي چې له دوی سره یې ژمنه شوې وه.
خو له دې ټولو سره مشرانو جرګې د رایو په اکثریت د ۱۳۹۹ کال بودیجه تائید کړه.
د ۹۹ کال په مالي بودیجه کې ۱۳۹ میلیارده افغانۍ پراختیایي او ۲۸۹ میلیارده افغانۍ عادي بودیجه په پام کې نیول شوې.
د مشرانو جرګې ناسته کې ټینګار پر دې و چې د ټاکنو پایلې دې اعلان شي او ټاکنیز کمېسیونونه دې د چا تر اغېزې لاندې نه راځي.
سناتورانو د هغه خبرو مخالفت هم وکړ چې ویل کېږي افغانستان کې دې لنډمهالی حکومت رامنځته شي.
مشرانو جرګه د لنډ مهالي حکومت رامنځته کېدل، خیال یادوي او لنډ مهالی حکومت د افغانانو لپاره زهرجن بولي.
سناتورانو له ټاکنو کمېسیون وغوښتل چې معترضو نوماندانو ته قناعت ورکړي، پاکې رایې له ناپاکو جلا کړي او ژر تر ژره لومړنۍ پایلې اعلان کړي.
