مشرانو جرګه وايي، وروستیو بریدونو ته په کتو طالبان سولې ته ژمن نه دي.
مشرانو جرګه تمه لري چې پاکستان ته د ولسمشر غني سفر به له لاسته راوړنو ډک وي .
سناتوران له اسلام اباد غواړي چې دا ځل د افغان سولې پروسه کې ریښتینې همکاري وکړي او طالبان وهڅوي چې له افغان حکومت سره مخامخ خبرو ته کیني.
سناتورانو انديښنه ښودلې چې وروستیو وسله والو او ځانمرګو بریدونو ته په کتو طالبان د سولې هوډ نه لري او اړتیا ده چې تر نظامي فشار لاندې ونیول شي.
د دغې جرګې غړي ټینګار کوي چې پاکستان دې نور له افغان سولې سره ریښتینې همکاري وکړي او هغه نفوذ چې پر طالبانو یې لري، باید افغان حکومت سره یې خبرې ته چمتو کړي.
سناتوران وايي وروستیو جګړو او د طالبانو دا پریکړه چې په روژه کې به هم خپل عملیات ونه دروي د دې ښکارندوی کوي چې دا ډله سوله نه غواړي او نه هم د افغان ولس ارادې غوښتنو ته درناوی لري.
دوی وايي یوازینۍ لار چې طالبان د مذاکراتو مېز ته مجبوروي هغه پوځي فشار دی او افغان حکومت باید طالبان دومره وځپي څو سولې ته غاړ کیږدي.
د ولسمشر محمد اشرف غني له حکم سره سم ګلالۍ نور ساپۍ هم د مشرانو جرګې انتصابي سناتوره شوه او لوړه یې وکړه.
د دغې جرګې غړو وویل په ټول افغانستان کې ناامني او جګړې زیاتې شوي او افغان ځواکونه باید د خلکو د ژوند خوندي ساتلو لپاره له خپلو ټولو امکاناتو کار واخلي .
