په داسې حال کې چې د اسلامي امارت د یو شمېر لوړپوړو چارواکو نومونه د ملګروملتونو امنیت شورا د بندیزونو په تور نوملړ کې لا هم پاتې دي، د مسکو فارمټ غونډه کې د افغانستان لپاره د روسیې ځانګړي استازي ضمیر کابلوف ویلي، هېواد یې غواړي د روسیې د بندیزونو له لېست د اسلامي امارت مشرانو نومونه حذف کړي، خو په خبره یې اوس یوازې د دغې چارې قانوني پړاونه پاتې دي چې د روسیې په بهرنیو چازو وزارت کې به پرې کار وشي.
د سیاسي چارو کارپوهان وايي، د روسیې دغه ګام به په سیاسي برخه کې د اسلامي امارت پر وړاندې د نورو هېوادونو دریځونه هم نرم او د رسمي اړیکو ټینګولو ته نږدې کړي.
د پوهنتون استاد فیض محمد ځلاند وايي: « مسکو فارمټ د سیمه ییز اتصال، امنیت او همغږۍ لپاره یو مهم دریځ دی. له دې دریځ یوازې د سرپرست حکومت چارواکي نه بلکې ټوله سیمه ډېرې ګټې ترلاسه کولی شي. دا چې مسکو اعلان کوي چې د ترهګرۍ له لېست د سرپرست حکومت مشران او چارواکي وباسي، دا یو ښه پرمختګ دی او د تعامل لپاره به لا ښه زمینه برابره کړي.»
که څه هم روښانه نه ده چې کرېملین به د روسیې د بندیزونو له لېست د اسلامي امارت چارواکو د نومونو لرې کولو په اړه پریکړه څه وخت او د کومو شرایطو له مخې کوي، خو د مسکو دغه اقدام له سیاسي پلوه د سرپرست حکومت لپاره لاسته راوړنه ګڼل کېږي.
د سیاسي چارو کارپوهان وایي، اوس په کار ده چې له نړۍ سره د تعامل لپاره اسلاميامارت جدی ګامونه پورته او پر هغو تګلارو له سره غور ورکړي چې د افغانستان او نړیوالې ټولنې ترمنځ د واټن زیاتېدو لامل شوې.
د سیاسي چارو کارپوه شهزاده مسعود وايي: « په اوسنیو شرایطو کې له هرڅه وړاندې اړتیا ده چې افغانستان له نړۍ سره د یوه مثبت تعامل له لارې خپلې اړیکې جوړې کړي. زموږ ملي ګټې ایجابوي چې باید له نړۍ سره اړیکې ولرو او نړۍ هم اړتیا لري چې د خپلو ګټو لپاره افغانستان سره مثبت روابط جوړ کړي. زه هیله من یم چې د دې اړیکو جوړولو لپاره هم نړیواله ټولنه او هم سرپرست حکومت کار وکړي.»
د افغانستان لپاره د روسیې ځانګړي استازي دغه څرګندونې داسې مهال دي چې د روسیې د بهرنیو چارو وزیر سرګي لاوروف د افغانستان په تړاو د مسکو فارمټ ناسته کې له لوېدیځ وغوښتل چې پرافغانستان لګېدلي بندیزونه لرې کړي او د دې هېواد په بیا روغونه او ثبات کې ونډه واخلي.
