لغمان کې د وسله والو طالبانو الفتح عملیات ناکام بلل شوي.
د لغمان والي محمد اصف ننګ شمشاد سره په ځانګړې مرکه کې ویلي وسله والو طالبانو له هلمند او کندهار هم تازه دمي طالبان راغوښتي وو او پلان یې درلود چې امنیتي پوستې سقوط کړی؛خو بریالي شوي نه دي.
اصف ننګ اعتراف کړی، چې په الینګار، علیشنګ، دولت شاه او بادپښت ولسوالیو کې لاهم په ډېرو سیمو کې ولسي خلک د وسله والو طالبانو په انحصار کې دي.
ننګ وایي، دې ولایت کې طالبان اوس کمزوي شوي او داځل یې دامنیتي پوستو سقوط لپاره له هلمند او کندهار هم تازه دمي طالبان غوښتي وو؛خو یوه پوستنه یې هم سقوط نه کړه.
دی وایي، وسله وال له افغان ځواکونو سره د جګړې په مهال د خلکو له کورنو ګټه پورته کوي، چې عملیات یې سخت کړي.
والي اعتراف وکړ، چې د لغمان له پنځوو په څلورو ولسوالیو کې لاهم په لرې پرتو سیمو کې ولسي خلک د وسله والو طالبانو په انحصار کې دي او د ژغورلو لپاره یې د وسله والو پرضد عملیات پیلوي.
طالبانو بیا د والي خبرې رد کړي، ذبیح الله مجاهد وایي، لغمان کې یې عملیات روان دي او نوربه هم تیز شي.
د دې ولایت خلک بیا له مسؤولینو غوښتنه کوي، چې په هغو سیمو کې دې د وسله والو پرضد ژر عملیات پیل کړي، چې مرکز مهترلام هم د امنیت له پلوه ګواښي.
