مشرانو جرګې امنیتي او دفاعي مسوولین استجواب کړي وو.
مسوولینو جګړه کې د ملکي تلفاتو پر زیاتېدو اعتراف وکړ.
ملي دفاع وزارت د ملکي وګړو د تلفاتو لوړیدل تبلیغات یادوي، خو ملي امنیت تاییدوي چې جګړه کې د ملکي وګړو تلفات لوړ شوي دي.
مشرانو جرګې د ملي دفاع، کورنیو چارو وزارتونو او د ملي امنیت ریاست مسوولین استجواب کړي چې د نامسووله وسله والو د فعالیت، جګړه کې د ملکي وګړو د تلفاتو لوړیدو، جنایي پيښو ګراف لوړیدو او پر مخالفو وسله والو د وسلو د پلور په تړاو خپلې اندیښنې شریکې کړي.
ملي دفاع وزارت مرستیال جګړه کې د ملکي وګړو د تلفاتو د لوړوالي راپورونه تبلیغات یادوي، خو د ملي امنیت رییس بیا مني چې تلفات لوړ شوي دي.
خو د مسوولینو د ځوابونو تمرکز پر دې و چې جګړه کې اوس بهرنۍ ترهګرې ډلې زیاتې فعالې شوي او د بیلابیلو هېوادونو وګړي یې مړه او ژوندي کابل کې سفارتونو ته سپارلي دي.
د جګړې شدت او د بهرنیو ترهګرو فعالیت په افغانستان کې هغه لاملونه یاد شول چې تلفات پکې لوړ شوي دي.
له دې سره کورنیو چارو وزارت وایي، د جنایي جرمونو ګراف راټيټ شوی او له نامسووله وسله والو سره مبارزه کې جدي دي.
که څه هم افغان امنیتي او دفاعي ادارې وایي چې په تعرضي حالت کې دي، خو سناتوران وایي، افغان ځواکونه په دفاعي حالت کې دي چې وسله والو او ترهګرو ډلو بریدونه زیات کړي دي.
