د زندانونو چارو سمون ادارې او پوهنې وزارت ترمنځ د همکاریو هوکړه ليک لاسلیک شو. د دې هوکړه له مخې، زندانيانو ته د زده کړو زمينه برابرېږي.
چارواکي وایي، هڅه کوي زندانیانو ته هم د عصري او دیني زده کړو داسې زمینه برابره کړي لکه څنګه چې د ازادو خلکو لپاره برابره شوې ده.
دوی زیاتوي، هڅه کوي ټول زندانيان داسې اصلاح کړي چې له ازادېدو وروسته بیا زندان ته په تګ اړ نه شي.
د زندانونو چارو سمون دارې رییس محمد یوسف مستري وايي: « دا وزیر صاحبان د دې لپاره راغلي چې موږ دا هوکړه لیک د دایم لپاره لاسلیک کړو، ترڅو بندیان له سواد زده کړې، عصري او دینې زده کړو او مسلکي زده کړو برخمن شي.»
د پوهنې وزارت د کيفيت د تضمين معين عبدالخالق صادق وايي: « زموږ دا ګام د دې ښکارندويي کوي چې دا نظام ملت، دین او ولس ته متعهد نظام دی. دا نظام ماشومانو او نا لوستو کسانو ته هم ژمن دی.»
د تازه لاسليک شوې هوکړې له مخې به ښوونکي په منظم ډول زندانونو ته ورځي او زندانیانو ته به عصري او ديني زده کړې ورکوي.
د زندانونو چارو سمون دارې رییس محمد یوسف مستري وايي: « د محبس وګړي به انشا الله له تعلیم او تربیې سره ازاد شي او یا به دومره اصلاحات په کې راغلي وي چې بیا به تر ډېره محبس ته په راتګ مجبور نه شي.»
د زندانونو چارو د سمون ادارې د ښوونې او بیا روزنې رییس نظرمحمد ناصري وايي: « له دې به هغه نوم لرې کېږي چې دلته به شکنجې، وهل او ټکول وو. نور به دلته علم او تغییر وي، شخصیت جوړونه به کېږي او ولس ته به داسې کسان وړاندې کېږي چې د ولس خدمت وکړي.»
دغې اداره د اسلامي امارت په راتګ سره د یوې اصلاحي ادارې بڼه خپله کړې او اوس په کې د ځورونې په ځای زندانیانو ته زده کړې ورکول کېږي. چارواکي ژمنه کوي چې زندانونه به د ظلم ځای نه وي او برعکس به په بشپړه توګه د اصلاح پر مرکزونو بدلېږي.
د پوهنې وزارت د کيفيت تضمين معين عبدالخالق صادق وايي: « اسلامي امارت دا هوډ کړی چې نور به محبسونو کې وحشت او دهشت ختم وي. له دې وروسته به محبس د ظلم او قتل ځای نه وي بلکې د زده کړو او تعلیم ځای به وي.»
د زندانونو چارو سمون ادارې چارواکي همدارنګه وايي، هڅه کوي په ټول هېواد کې زندانونه په داسې اصلاحي مرکزونو بدل کړي چې ترې ازادېدونکي کسان په سالمه بڼه بېرته ټولنه کې مدغم شي.
