د امربالمعروف او نهي عن المنکر وزیر شیخ محمد محمود د چهار شنبې پر ورځ د « ۱۴۰۰کال د تلې پر ۲۸ مه» د کندهار ولایت د ښځو چارو ریاست د امر بالمعروف او نهيي عن المنکر په نوم ونوماوه.
محمود زیاته کړه:« یوازې امر باالمعروف دې ته نه وايي، چې موږ عوام ونیسو او هغه ډبوو، بلکي موږ به امربالمعروف له خپلو مجاهدینو راپیل کړو.»
د طالبانو د کابيني دغه غړي يو ځل بيا د مېرمنو د حقونو او د نجونو د تعلم په اړه د طالبانو مخالفت رد کړ او ويې ویل، طالبانو د ښځو چارو وزارت له منځه نه دی وړی، بلکي د مېرمنو د حقونو د دفاع لپاره د ښځو چارو وزارت او د نجونو د تعلم پر نوې تګلاره کار روان دی.
محمود زیاته کړه:« اسلامي امارت یوازې تش په نوم د ښځو لپاره وزارت نه غواړي، بلکې موږ غواړو، چې د ښځو لپاره واقعي حقوق ورکړو او د هغوی ستونزې حل کړو.»
بل پلو د کندهار د امر بالمعروف او نهي عن المنکر تازه ټاکل شوی مشر شیخ الحدیث عبدالرحمن منیر وايي، د ټولني د ثبات لپاره به هر ګام له ديني عالمانو سره پر ګډه پورته کوي.
منیر زیاته کړه: موږ به کوشش وکړو، چې د کندهار له جیدو عالمانو ښې مشورې تر لاسه کړو او د هغو مشورې به نظر کې ونیسو، تر څو په یوه علمي طریقه دغه پروسه مخکې یوسو.»
که څه هم د طالبانو د مخکني دولت پر مهال د امر بالمعروف او نهي عن المنکر فعاليت جبري وو، خو دا ځل چارواکي وایي، په ټولنه کې به د تېر خلاف د نرمۍ له لارې د منکراتو پر وړاندي مبارزه کوي.
